Tun Pehin Sri Dr Wan Junaidi Sereta Bini Likun Datai Di Brunei Ungkup Pejalai Gawa
Disiarkan pada 23 Jun 2024
Sumber Berita: UKAS
BANDAR SERI BEGAWAN: Yang di-Pertua Nengeri Sarawak, Tun Pehin Sri Dr Wan Junaidi Tuanku Jaafar sereta bini, Toh Puan Fauziah Mohd Sanusi likun datai di Brunei Darussalam ba pejalai gawa ke Perintah pengelama tiga hari di menua nya berengkah sehari tu.
Pejalai gawa ke Brunei Darussalam nya keterubah diatur kenyau Tun Pehin Sri Dr Wan Junaidi angkat sumpah nyadi Yang di-Pertua Nengeri Sarawak kelapan kena 29 Januari tu tadi.
Bilun khas ke ditepan Tun Pehin Sri Dr Wan Junaidi sereta raban diligit likun sangkai di Padang Bilun Antarabansa Brunei urung pukul 12 ngalihari jam menua nya.
Sama bela nyempulang iya Sapit Premier Sarawak, Datuk Amar Awang Tengah Ali Hassan sereta Sekretari Perintah Sarawak, Datuk Amar Mohamad Abu Bakar Marzuki.
Penatai Yang di-Pertua Nengeri Sarawak sereta bini enggau raban diligit udah diambat Menteri pengangkut enggau Infokomunikasyen ke mega Menteri Penyempulang,Pengiran Dato Seri Setia Shamhary Pengiran Dato Paduka Mustapha.
Pendatai dipun enggau Tun Pehin Sri Dr Wan Junaidi meresa Baris Basa Diraja datai ari raban Ngena Senyata Diraja Brunei.
Tembu meresa Baris Basa Diraja, Yang di-Pertua Nengeri Sarawak sereta bini udah nya mupuk ke endur diau pengelama tiga hari sekumbang penemuai nya.
Seraya muak ke lemai, Yang di-pertua nengeri Sarawak begulai enggau raban diligit deka ngatur penemuai ke Muzium Keresa Kebesaran Diraja di tengah Mengeri Seri Begawan enggau Palan Sejarah Brunei.
Seraya muak ke malam, Tun Pehin Sri Dr Wan Junaidi sereta Toh Puan Fauziah deka ngulu Pengerami Makai Lemai Begulai Enggau Rayat Sarawak di Opis Suruhanjaya Tinggi Malaysia ditu.
Datai ba hari kedua, Yang di-Pertua Nengeri Sarawak deka mupuk nemuai ngagai Kebawah Duli Yang Maha Mulia Paduka Seri Baginda Sultan Haji Hassanal Bolkiah Mu’izzaddin Waddaulah Ibni Al-Marhum Sultan Haji Omar ‘Ali Saifuddien Sa’adul Khairi Waddien di Astana Nurul Iman urung pukul 11.30 pagi.
Tembu pengawa nya, Tun Pehin Sri Dr Wan Junaidi deka ngabas Balai Khazanah Islam Sultan Haji Hassanal Bolkiah di Jalan Pengiran Babu Raja pukul 3 ngalihari, lalu bertahlil di Kubah Makan Diraja sereta ngulu pengerami makai lemai serumpu begulai enggau raban diligit.
Ba hari ketiga, Tun Pehin Sri Dr Wan Junaidi sereta raban diligit deka ngatur pejalai nemuai ngagai Palan Sejarah Brunei enggau mudik Sungai Brunei sebedau mupuk pulai ke Sarawak pukul 2.30 ngalihari.-EDISI UKAS
