KUCHING: Kuching dipilih nyadi tuai rumah Pekit Antarabansa #BorneoPickleball ke deka diatur 9 ngagai 12 Oktober ila.
Menteri Nembiak, Lumba enggau Pemansang Orang Dagang (MYSED) Dato Sri Abdul Karim Rahman Hamzah madah, Pekit Antarabansa Pickleball Besai di Malaysia enggau Borneo tu ulih meri pemanah ngagai Sarawak dikena negapka profil menua tu bekaul pekara lumba.
“Sarawak nyadi tagit taun tu serimbai enggau pengawa kitai ti ngatur Lumba Malaysia (SUKMA) bulan Ogos ila.
“Tu nyadi pelasar Sarawak mantaika chara kitai ngatur pekit lumba ba renggat global lalu ulih ngangkatka imej menua kitai nyadi palan lumba,” ku iya.
Iya nerang pekara nya lebuh bejadika Pengawa Media Pekit Antarabansa #BorneoPickleball di Begunan Baitulmakmur II, Petra Jaya, sehari tu.
Iya ke mega Menteri Dagang Temuai, Industri Kreatif enggau Seni Pemerindang nya madah baru, pemayuh serakup ti ngambi bagi ba pengawa lumba di nengeri tu ulih mantu ngangkatka main baru di Sarawak.
Iya mega madah, tu ulih narit ati orang baru beranakka puku ba perengkaguna enggau infrastruktur lumba.
“Dikena ngerembai enggau negapka agi komuniti lumba Sarawak mega begunaka pelajar, kaul, kerejasama enggau ngambi bagi baka ke deka dipeda ba pekit pickleball tu.
“Pickleball tu ila engka ulih dipasuk ba SUKMA tauka SEA Games enti mujur enggau diterima mensia mayuh,” ku iya.
Iya mega nambah, Perintah Sarawak semampai deka mantu ngangkatka nengeri tu nyadi palan lumba.
Sama bela datai, Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew, Sapit Menteri Nembiak, Lumba enggau Pemansang Orang Dagang Dato Gerald Rentap Jabu, Chairman BESarawak Dato Sri Abang Abdul Karim Tun Datuk Abang Haji Openg, Sekretari Mendam MYSED Morshidi Fredrick, Tuai Pegawai Eksekutif Kaunsil Lumba Sarawak (SSC) Awang Putrayusrie Awang Redzuan enggau temuai dipebasaka bukai. -EDISI UKAS
