SIBU: Rebak biak Sarawak datai ari pupu bansa di nengeri tu dipinta nyadi ejen penyerakup lalu sida ke deka nganti bala tuai enggau nentu pemansang jemah.
Sapit Menteri Ba Opis Premier Sarawak (Pekara Korporat, Pemadah Enggau UKAS), Datuk Abdullah Saidol madah, sida patut ngibun ulah diri bemalinka ulah rindu ke pengelantang.
“Aku deka ngelalau nembiak rebak baru diatu enda terunda-runda enggau sentimen ti ulih ngasuh ati nyima enggau ngenyauhka diri ari pekara ngaul raban bansa.
“Penyerakup enggau pemanah kaul pupu bansa di Sarawak tu mandangka penyelai imej bansa Sarawak ke pemadu nemban lalu kaul bebakih enggau ulah bebatak asur mayuh etnik ba Tanah Kenyalang tu nyadi pesaka budaya ke patut dikemegah enggau ditan,” ku iya.
Iya bejaku munyi nya ba Program Sungkei begulai enggau UKAS 2024 di Sibu, Hari Tiga.
ADUN Semop nya mega madah, perintah nengeri betuai ke Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg mega betatika pemansang modal mensia ngagai rebak biak.
Kebuah pia ku iya nyemetak madah, ngambi ke polisi ekonomi baru Sarawak deka disulur enggau diaduka Anak Sarawak tu empu.
“Ari nya mega aku meransang bala nembiak Palan Pelajar Tinggi (IPT) kelebih agi di Sarawak beambi ulih ba program latih industri ba Opis Perintah Sarawak.”
“Kebuah pia laban ukai semina endur sida ngulihka peneleba gawa aja tang mega ulih meretika chara opis perintah ngatur pengawa,” ku iya.
Ba program ke sebaka, Datuk Abdullah bisi nyuaka pemeri ngagai 35 nembiak Tahfiz Darul Ullum enggau Tahfiz Hidayatul Quran An-Nur.
Bela datai, Sapit Sekretari Perintah Sarawak (Operasyen) Datu Hii Chang Kee, Residen Sitak Sibu Datu Wong Hee Sieng, Direktor Unit Komunikasi Awam Sarawak (UKAS) Samuel Simon, Temenggong Dato Vincent Lau Lee Ming, Temenggong Stanley Geramong Bandar, Mandal Canselor Universiti Teknologi Sarawak Prof Datuk Khairuddin Abdul Hamid, Pegawai Tadbir Ukas Datu Takun Sunggah sereta temuai ke bukai.
