Tunda Semangat Muqarabah Sarawak Ngambi Pegari Di Mata Dunya
Disiarkan pada 21 Jun 2024
Sumber Berita: UKAS
SARIKEI: Perintah Sarawak nunda semangat Muqarabah ngatur pengawa ke deka ngasuh nama nengeri tu pegari dipeda di mata dunya.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, polisi Perintah Sarawak ke nyemelaka rampa menua enggau pemansang udah ditibak ari semangat Muqarabah.
Ku iya, Muqarabah nya mai reti ngeleda tauka ‘mindfulness’ ba dalam jaku English.
“Alhamdulillah enggau semangat Muqarabah tu, Perintah Sarawak ulih beratika agi pemansang nyaga rampa menua.
“Nyentuk sehari tu, kitai udah dikelala selampur dunya nyadi pengeluar kuasa hidrogen,” ku iya.
Iya madah munyi nya ba mua mayuh rambau bejadika pengawa nyeleti Masjid Al-Muttaqqin di Sarikei, kena Hari Lima.
“Ungkup masjid tu, Datuk Len Salleh udah minta RM1.5 juta, nyadi aku meri RM1.5 juta aja.
Masjid baru tu udah diseleti ngena ungkus sepenyampau RM 9.5 juta ke ulih endur mensia mayuh urung 2,500 begempuru.
Dulu ari nya, Datuk Patinggi Abang Zohari sembiang Jumaat begulai enggau temuai dipebasa sereta mensia mayuh.
Sama bela datai Speker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar, Pemangku Sekretari Perintah Sarawak Datu Dr. Muhammad Abdullah Zaidel, Sapit Menteri Perambu Mengeri, Pengatur Tanah enggau Rampa Menua Sarawak Datuk Len Talif Salleh, Sapit Menteri Utiliti enggau Telekomunikasyen Datuk Dr Abdul Rahman Junaidi, Kaban Parlimen Sarikei Dato’ Sri Huang Tiong Sii, Kaban Parlimen Tanjung Manis Ir Yusuf Abdul Wahab enggau Yang Dipertua Kaunsil Islam Sarawak Datuk Misnu Taha.-EDISI UKAS
