Penemu Deka Numbuh Palan Pelajar Tinggi Nengeri Dilanggur
Posted on 20 Jun 2024
Source of News: UKAS
KUCHING: Penemu deka numbuh Palan Pelajar Tinggi Nengeri (IPTN) benung dilanggur ba tuju meri pengelantang ngagai palan pelajar tinggi enggi perintah nengeri.
Sapit Menteri Pelajar, Inovasyen enggau Pemansang Pengelandik Sarawak, Datuk Dr Annuar Rapa’ee madah, perambu nya benung dirandau Opis Menteri Pelajar Tinggi (KPT).
“Beberapa buah nengeri bisi palan pelajar tinggi enggi Perintah Nengeri baka Melaka, Selangor lalu di Sarawak kitai bisi lima.
“Sekeda ari penguntung numbuhka IPTN iya nya Perintah Besai nyangka ulih meri belanja ngagai palan pelajar tinggi enggi Perintah Sarawak.
Iya madah munyi nya maya dirandau media sepengudah Pengerami Bejadi Konferens Antarabansa Bekaul Kokurikulum enggau Penemu Belajar (ICCLE) 2024 Keterubah ditu, Hari Empat.
Nambahka jaku iya, Datuk Dr Annuar madah, lima buah palan pelajar tinggi enggi Perintah Nengeri, iya nya Universiti Curtin, Universiti Swimburne, Universiti Teknologi Sarawak (UTS), Kolej Universiti I-CATS enggau Palan Penyulut Teknologi Sarawak (CENTEXS).
“Taja pan palan pelajar tinggi tu enggi Perintah Sarawak tang agi ba kategori universiti peribit ,lalu nadai nerima geran tauka belanja ari Perintah Besai,”ku iya.
Sama bela datai Sapit Mandal Canselor (Pekara Pelajar enggau Alumni) Unimas Profesor Ir Ts Dr Al-Khalid Othman.-EDISI UKAS
