KUCHING: Program Kimpin Pengelikun Jalai Alun Renggat Sarawak berserimbai enggau nyambut pengerami ba taun 2024 udah diatur ba Stesen PETROS Darul Hana, Hari Tiga.
Menteri Pengangkut Sarawak Dato Sri Lee Kim Shin madah, batang tuju program nya diatur dikena meri penyedar bekaul pengelikun enggau ngurangka kes bebadi ba jalai alun lebih agi maya musim pengerami.
Ku iya, program tu ngenatika sida ke deriba kerita, orang nepan motosikal enggau ‘rider’ nganjung pemakai.
“Nya alai, Kaunsil Pengelikun Jalai Alun Sarawak (MKJRS) enggau Menteri Pengangkut Sarawak (MOTS) besaup ngatur program tu dikena meri penyedar ngagai mensia mayuh bekaul pengelikun maya nengah jalai alun,” ku iya.
Berebak enggau nya, iya mega madah 5,278 iti kes penusah jalai alun udah dirikodka ba selampur Sarawak ari Januari nyentuk March 2024.
Iya madahka, bisi empat kategori udah dirikodka iya nya kes penusah jalai alun ngembuan rikod ti pemadu tinggi iya nya 5,092 kes lalu ditangkan enggau kes bebadi bisi 75 kes, kes enda balat 74 kes enggau kes balat 37 kes.
Pia mega ku iya, sida ke deriba tauka nepan motosikal patut bejimat ba jalai alun lebih agi maya Hari Raya Aidilfitri tu ila.
“Tiap taun, kami suah ngingatka rayat bejimat nengah jalai alun maya musim pengerami.
“Orang ke pulai ngagai menua mega dipinta meresa kerita sida dulu.
“Maya deriba mega, tentuka kita udah chukup tinduk lalu ngetu tiap dua tauka tiga jam maya pejalai jauh tauka besilih deriba nyema lelak ketegal pekara nya ulih ngujungka kes penusah ba jalai alun,” ku iya.
Dato Sri Lee mega madah, opis iya deka mansik endur ke suah nyadi kes bebadi ba pekara bekaul gaya hari, tauka penukuh jalai ti ngerikod 5 peratus ari penyampau 21,419 kes taun siti tadi.
“Opis aku deka betemu enggau Institut Pemansik Pengelikun Jalai Alun Malaysia (MIROS) bekaul pekara nya.
“Pengawa pansik nya ila deka diadu ba semua jalai alun nyengkaum Jalai Besai Pan Borneo dikena beratika bakani kes bebadi nyadi ketegal penukuh infrastruktur jalai nya,” ku iya.
Bela datai, Sapit Menteri Pengangkut Sarawak Datuk Dr Jerip Susil, Sapit Menteri Utiliti enggau Telekomunikasyen Datuk Dr Abdul Rahman Junaidi, Residen Kuching Norleha Shariff, Sapit Sekretari Mendam Opis Menteri Pengangkut Sarawak Selamat Jati Yanjah, Menijer Besai SEDC Energy Datu Abdul Hadi Datuk Kadir enggau Direktor Opis Pengangkut Jalai (JPJ) Sarawak Norizan Jili. -EDISI UKAS
