KUCHING: Yang di-Pertua Nengeri Sarawak Tun Pehin Sri Dr Wan Junaidi Tuanku Jaafar datai ngulu pengerami makai Selamat Aidiladha Kaunsil Islam Sarawak ke diatur di Dewan Hikmah, Petra Jaya, kena Hari Satu.

Pengerami nya mega digulu Premier Sarawak Datuk Patinggi Tan Sri Dr Abang Abdul Rahman Zohari Tun Datuk Abang Openg enggau bini, Puan Sri Datuk Amar Juma’ani Tuanku Bujang.

Dulu ari nya, Tun Pehin Sri Dr Wan Junaidi sereta semua temuai dipebasa sembiang sunat Aidiladha begulai enggau raban orang Islam ari ngelingi Kuching ke betuai ke Iman Besai Nengeri Sarawak.

Bala Tuai Nengeri nya mega ngulu pengawa takbir raya bebala mayuh di Masjid Jamek Nengeri Sarawak sebedau Takbir Raya didinga di Masjid Jamek Nengeri Sarawak.

Tembu Khutbah, bala temuai dipebasa mansang ngagai mua Masjid Jamek ungkup begambar begulai sebedau mupuk ke Dewan Hikmah laban ngulu pengerami Makai Selamat Aidiladha Kaunsil Islam Sarawak.

Ungkup rikod, sepenyampau 1,240 iku chapi disayat ngambi disadung ngagai raban asnaf di selampur Sarawak serimbai ngintu Hari Raya Aidiladha taun tu. 

Sama datai, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang  Nasar, Menteri Dagang Temuai, Industri Kreatif Enggau Seni Pemerindang Dato Sri Abdul Karim Rahman Hamzah, Sapit Menteri Utiliti Enggau Telekomunikasyen Datuk Dr Abdul Rahman Junaidi, Pemangku Sekretari Perintah Sarawak Datu Dr Muhammad Abdullah Zaidel sereta Yang Dipertua Kaunsil Islam Sarawak Datuk Misnu Taha.-EDISI UKAS