KUCHING: Opis Menteri Nembiak, Lumba enggau Pemansang Orang Dagang Sarawak (MYSED), besai pengandal Megalane Sarawak, Batu Kawa dipilih nyadi kelang tenpin boling ba Pekit Lumba SEA ke deka diatur di Malaysia.
Juluk ati nya dibantaika Menteri MYSED, Dato Sri Abdul Karim Rahman Hamzah sambil madah ke diatu perintah nengeri enggau Perintah Besai benung berundingka bansa lumba enggau main ke deka diatur Sarawak enggau Kuala Lumpur.
“Diatu kitai benung berunding enggau Perintah Besai ulih ngatur sebagi ari lumba enggau main ulih dipekit ba Sarawak.
“Pia mega, sebagi ari lumba enggau main tu ila iya nya tenpin boling ke dikearap ulih diatur ba Sarawak.
“Kitai mega bisi fasiliti diri empu ke chukup meruan ke ulih dikena ba pengawa ngatur Lumba SEA. Aku berasai temegah ati enti sema sebagi ari lumba enggau main iya nya tenpin boling ulih diatur ba Kuching.”
Iya bejaku munyi nya lebuh rambau bejadika Nutup Pekit Tenpin Boling Antarabansa Sarawak (SIOTBC) 2024, di Batu Kawa kena Hari Enam.
Ngenang silik agi, iya ke mega Menteri Dagang Temuai, Industri Kreatif enggau Seni Pemerindang Sarawak (MTCP) madah baru, Perintah Sarawak seruran merangsang serakup lumba enggau main tauka gerempung ukai dikuasa perintah (NGO) ngatur mayuh agi pekit lumba enggau main antarabansa dikena nyungkak agenda pemansang enggau nambahka kualiti lumba enggau main di nengeri tu.
Ku iya, nya setipak enggau visyen MYSED deka ngangkatka Sarawak nyadi kuasa lumba enggau main di menua tu.
“Pia mega, MYSED enggau MTCP seruran nyikap diri ba pengawa lumba enggau main di Sarawak, ngambi ulih meri pemaik kelebih agi ba industri dagang temuai.
Sama datai, Kaban Kaunsil Nengeri Senator Dato Ahmad Ibrahim, Sekretari Mendam MYSED Morshidi Fredrick, Tuai Penulung Sekretari MTCP Nasir Lariwoo, Residen Gerempung Tenpin Boling Amatur Sarawak (ABAS) Sunny Si Poh Teng, Sapit Residen ABAS Shaifulbahri Shukri enggau Mandal Residen ABAS Robert Lu Nam Min.
Kelimpah nya, atlit menua, Ahmad Azriq Izamuddin ngari ke National Podium Squad menggi gelar champion SIOTBC 2024 pengudah ngalahka pemekit ari Singapore, Jonovan Neo Ze Min (Trinity Academy) ba renggat kepenudi Kategori Tebuka (Last Man Standing).
Ahmad Azriq ngelabuhka pin sepenyampau 192 ngulihka perais mata duit RM20,000 sereta trofi.
Seraya Jonovan ke ngelabuhka 174 pin tepantup ati bulih RM10,000 sereta trofi.
Penuduk ketiga diempu Muhammad Syazirol Shamsuddin ke mega ngari ke National Podium Squad lalu nerima perais mata duit RM5,000 sereta trofi seraya Nabil Aiman Mantaib ngari ke Sabah Sukma Team ba penuduk keempat nerima RM2,500 enggau trofi.
Ba kategori Classified Master, atlet Sarawak Chong Jun Foo ( ABAS ) diangkat nyadi champion pengudh ngelabuhka 2096 pin, penuduk kedua Muhammad Hafiz Darwisy Azhlan ( Penang/MMBC ) enggau Edric Lim Xian Jun ari Singapore ( Trinity /Academy ) ba penuduk ketiga.
Kategori Biak Ari 25 Taun ( STEPLADDER ) meda Muhammad Hafiz Darwisy Azhlan ( Penang/MMBC ) nyadi champion, Tsen Fan Yew lumur dua enggau Nabil Aiman Mantaib lumur tiga.
Ba Kategori Senior Lelaki, pengari Singapore, Rick Tan enggau Adam Chew Yin Choi bela ba penuduk lumur satu enggau dua seraya penuduk ketiga dipenggi Robert Lu (ABAS).
Lalu, ba Kategori Senior Indu, Datin Rakia’Ah Ali diangkat nyadi champion, seraya Michelle Wong enggau Datin Zarina Halim ba penuduk lumur tiga.-EDISI UKAS
