KUCHING: Rambai jaku Sarawak champion deka nyadi ‘Peransang’ ngagai kontinjen Para Sukma Malaysia (PARA SUKMA) Sarawak ngulihka 83 midul emas lalu nyadi champion ke-14.
Sapit Premier Sarawak, Datuk Amar Professor Dr. Sim Kui Hian madah, iya chukup andal ke Sarawak ulih nyadi champion Para SUKMA sekali tu beratika pengeransing ati ditunjukka bala atlit.
“Pengeransing ati bala atlit Para SUKMA tu meri perangandal sida ngagai kitai, sereta penau ke bisi.
“Aku berasai temegah ati meda bala atlit chukup ransing ati sereta meri pengandal ngagai kitai, sida ulih nyadi champion ba semua main enggau lumba Para SUKMA sekali tu, “ ku iya.
Iya bejaku munyi nya maya dirandau pemberita pengudah bejadika pengawa Niap 100 Hari Ke Para SUKMA Ke-21 Sarawak 2024 ba Hotel enggau Palan Konvensyen Raia di Kuching, kena Hari Lima.
Dulu ari nya, Datuk Amar Professor Dr. Sim mega madah ke pengandal diri ngagai kontinjen Para SUKMA ulih ngerampas gelar champion ke kala dipenggi 13 kali kenyau ari taun 1994 nyentuk 2018.
Beratika pengelebih Sarawak nyadi tuai rumah, nya ulih nyadi peransang ngagai semua atlit ba lumba tu nyadi champion besai.
Nangkan nya, Menteri Pemansang Indu, Nembiak Mit Enggau Pengelantang Komuniti Sarawak, Dato Sri Fatimah Abdullah madah, bisi 334 pekit ungkup 10 bansa lumba enggau main.
Iya ke mega Chairperson begulai Komiti Besai Para SUKMA ke-21 madah, entara lumba nya nyengkaum olahraga, nyemerai, badminton, pingpong, boling, boccia, lawn bowl, angkat berat, nimbak laja enggau chatur.
“Bisi 15 Nengeri nyengkaum Kandang menua selampur Malaysia mega ngambi bagi ba pekit lumba enggau main ke digulu 1,528 atlit, 49 atlit simpan, 788 pegawai enggau 75 menijar bala kontinjen," ku iya.
Ba pengerami nya, bisi mega diatur pengawa nyuaka surat dichiri Chef De Mission, Sapit Chef De Mission enggau Penulung Chef De Mission kontinjen Sarawak.
Sapit Menteri Pengelantang Komuniti Sarawak, Datuk Mohammad Razi Sitam dichiri megai tanggungpengawa nyadi Chef De Mission disaup Sapit iya, Lamat Nyalay begulai 10 Penulung Chef De Mission enggau 13 Pulung Chef De Mission.
Sama bela datai, Menteri ba Opis Premier Sarawak Dato Sri John Sikie Tayai, Sapit Menteri di Opis Prmier Sarawak (Undang-undang enggau Adat Bumiputera) Datuk Jefferson Jamit Unyat, Sapit Sekretari Perintah Sarawak (Operasyen) ke mega Tuai Pegawai Eksekutif Lumba Malaysia (SUKMA) enggau Para SUKMA Datu Hii Chang Kee, Sekretari Mendam Opis Menteri Pemansang Indu, Nembak Mit Enggau Pengelantang Komuniti Sarawak Datu Felicia Tan Ya Hua enggau Presiden Kaunsil Paralimpik Malaysia Dato’ Sri Megat D.Shahrizam Zaharudin, Raban Chef Mission enggau Sapit Chef De Mission, Tuai Opis Enggau atlit Para SUKMA Sarawak.-EDISI UKAS
