KUCHING: Menteri Besai Pahang, Dato Sri Diraja Wan Rosdy Wan Ismail enggau bini, Datin Sri Diraja Dato Burhah Mohammed mujur datai ba Padang Bilun Antarabansa Kuching (KIA), nyerumba penemuai gawa tiga hari ke Sarawak, malam Hari Empat tu tadi.

Seduai datai pukul 8.20 malam, diambat Sapit Menteri Kuasa enggau Pemeruan Rampa Menua Sarawak, Datuk Dr Hazland Abang Hipni.

Tuju penemuai nya dikena negap kaul nengeri, daya idup sereta nyerungkai peluang kerejasama ba pemansang begulai.

Pun bulan Februari taun tu tadi, Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Fauziah Mohd Sanusi bela ngatur penemuai gawa tiga hari ngagai Pahang.

Nitih ke langgur, Menteri Besai Pahang enggau bini disadang ngulu Pengerami Makai Lemai Masa Sarawak-Pahang di Kompleks Kunsil Nengeri Sarawak, lemai Hari Lima.

Sida deka diperindang enggau pemerindang budaya ke diatur ba ‘Dewan Santapan’.

Lalu kena Hari Enam, seduai enggau raban bukai deka nemuai ngagai Seri Gedong Songket di Simunjan dikena meda semak agi pesaka tenun tebilang Sarawak.

Penemuai tu dikena berati kraf jari menua, dagang raban menua sereta pengeransing ngangkatka baru identiti daya idup nengah pesaka tekstil.

Muak ke lemai, Menteri Besai dipelaba deka ngulu Pengerami Bejadi Festival Gendang Sarawak 2025 ba Waterfront Kuching.

Menteri Besai Pahang deka pulai tumu pagi 2 November, lalu Datin Sri Diraja deka nampung penemuai iya ngaul aktiviti bepelasarka budaya. -EDISI UKAS