KUCHING: Business Events Sarawak (BESarawak) sehari tu madahka Sapit Sekretari Perintah Sarawak (Operasyen) Datu Hii Chang Kee dichiri nyadi Chairman kaunsil Direktor ti baru berengkah 1 November 2025.
Iya nganti Dato Sri Abang Abdul Karim Tun Datuk Abang Openg ke udah pinchin Ogos tu tadi.
Pengawa nyiri iya ke tebilang ba pengawa administrasyen mayuh bepeneleba nya dipeda siti inisiatif strategik dikena negap penuduk Sarawak ba industri dagang renggat serantau enggau antarabansa seriris enggau juluk ati Strategi Pemansang Udah COVID-19 (PCDS) 2030.
Datu Hii ke nyadi Sapit Sekretari Perintah Sarawak (Operasyen) nyadi tuai ba bidang komunikasyen perintah, transformasyen servis, inovasyen sereta digitalisasyen servis perintah.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, pengawa nyiri nya endang engkeman setipak enggau pengeransing perintah nengeri ke deka negap sektor perintah enggau industri.
“Penuduk Datu Hii ba perintah ngulihka iya ngempung polisi enggau bejalai ke polisi, nentuka Sarawak nyadi model iring tuai inklusif alai kerejasama perintah enggau industri nyungkak pemansang meruan,” ku BESarawak ba siti penerang, Hari Empat.
Nerang bekaul tunga kuing BESarawak, Datu Hii madah deka beratika program besai ke meri pemaik ekonomi, rama enggau pemansang meruan ngagai Sarawak.
“Dalam timpuh lima taun deka datai, kitai deka ngubah Sarawak nyadi palan program dagang strategik bepelasarka tiga pugu iya nya transformasyen enggau inovasyen, meri penguntung enggau legasi, sereta bekunsi enggau pemansang modal mensia,” ku iya ba penerang nya.
Iya bela nerangka lima batang bidang ke deka nyadi pugu pelin pemansang BESarawak iya nya, Pemansang palan, Bemacham Makit, Transformasyen digital, Iring Tuai Meruan sereta Pemansang Penau.
“Bidang tu deka nyadi sukung ngagai juluk ati Sarawak ke deka nyadi palan global ba program dagang berega besai, bepelasarka pemansang sereta kerejasama ke bela sama dikemegah,” ku iya baru.
Enggau peneleba lebih 30 taun ba servis perintah, Datu Hii ukai nama baru ba sektor dagang temuai enggau program dagang.
Sebedau tu, iya kala gawa nyadi Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak, lalu bela ngulu pengawa nyendia Pelin Besai Dagang Temuai Sarawak 2021–2035.
Datu Hii bela dikelala ba renggat antarabansa nyadi tukuh ti ransing negi agenda program legasi nengah iring tuai iya ba Legacy Event Advocacy Policy (LEAP) Summit ti nempa Borneo Legacy Declaration, disukung pengaga polisi enggau tuai industri ari Malaysia, Australia, Filipina enggau United Kingdom.
Sekeda ari penyulut bukai iya nyengkaum pemujur ba Kaunsil Dagang Temuai Sarawak (STB), Kaunsil Seni Sarawak (SAC), enggau Tourism Malaysia sereta tanggungpengawa besai ba pemansang Muzium Budaya Borneo.
Pengawa nyiri nya kelai berengkah jeman baru BESarawak ti ngemerat iring tuai inklusif, pemansang bepelasarka legasi, sereta ngentapka penuduk Sarawak nyadi palan global program dagang.-EDISI UKAS
