TOKYO: Sarawak ngenegap sektor berikan enggau akuakultur nengeri ari pengawa berati model pansik Jepun bepelasarka sains enggau nengah Agensi Pansik enggau Pelajar Berikan Jepun (FRA).

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, Jepun nyadi chunto pemadu manah ba pengawa ngemansangka sistem pansik berikan ti tegap, puh sereta setipak enggau polisi perintah, industri sereta akademik.

“Kitai deka meratika baka ni Jepun mujur nempa kapasiti pansik sereta ulih ngentapka bidang akademik, industri enggau polisi perintah.

“Peneleba tu endang engkeman dikena Sarawak ngenegap ekosistem pansik enggau latih ba sektor akuakultur enggau marin,” ku iya.

Iya madah munyi nya maya penemuai gawa ngagai FRA di Tokyo, ke bela disempulang Sapit Menteri Industri Pemakai, Komoditi enggau Pemansang Kandang Menua (Komoditi enggau Pemansang Kandang Menua) Datuk Martin Ben sereta Direktor Opis Betanam Betupi Sarawak, Dominic Chunggat.

Deligit Sarawak bela diberi penerang bekaul model Ngatur Pengawa Berikan Bepelasarka Sains ti begunaka data satelit, model dinamik tasik sereta kerejasama enggau raban orang berikan dikena melaba ubah ekosistem enggau gaya ngulihka ikan.

Maya nya, Dato Sri Dr Stephen madah, Sarawak bisi ati deka nunda chara Jepun ngatur bansa ikan invasif ti ngeruga biodiversiti menua, nyengkaum bekaul ikan Amazon ke tama ngagai sungai Sarawak lalu ngeruga bansa ikan asal.

Nambah ke jaku iya, iya madah, penemuai nya meri awak ngagai Sarawak nyintal kerejasama pansik sereta latih timpuh pandak ari baruh Japan International Cooperation Agency (JICA) ungkup pegawai enggau pemansik menua.

Kelimpah ari nya, deligit mega diberi penerang bekaul National Fisheries University ari baruh FRA ke ngembuan tanggungpengawa matih nembiak sereta profesional ba bidang sains marin, proses produk ari pemakai tasik enggau injiniring akuakultur.-EDISI UKAS