KUCHING: Unit Komunikasi Awam Sarawak (UKAS) merambu deka ngenegap infrastruktur enggau pengelikun siber nengah pengawa betemu sereta bekunsi penemu strategik begulai enggau kompeni Humanlogica enggau bakih teknologi iya, FTP di Bilik Aum UKAS ditu, Hari Empat.
Pengawa betemu nya betuaika Direktor UKAS, Awang Putrayusrie Awang Redzuan ke nyambut penatai deligit diulu Tuai Pegawai Eksekutif Humanlogica, Dr. Kamree Aziz.
Pengawa tu diatur nangkan setaun Audit Pengelikun Siber UKAS (Ogos 2024) digaga nitih Akta Agensi Pengelikun Siber Nasional (NACSA) 854.
Batang pekara ke diperati iya nya refleksi bekaul penanggul sereta pekara ke ditentu maya audit sebedau tu.
Kelimpah ari nya bela diatur iya nya, pengawa bejurai ke langgur mutar penanggul ari raban Humanlogica enggau FTP nengah Content Management System (CMS) baru sereta aplikasyen dikena nambah manah atur penerang, media enggau data dalam UKAS.
Maya nya mega, Awang Putrayusrie ngemerat pemesai reti atur enggau pengelikun data ti efisyen seriris enggau tanggungpengawa UKAS nyadi agensi penabur penerang perintah.
“Data kitai mungkur macham langkar baka berita, program, gambar, video, jaku tangkan, infografik, nabur penerang enggau montaj ke patut disimpan enggau likun sereta muntang digiga ungkup guna timpuh panjai.
“Nya kebuah kitai begunaka sistem ti sistematik agi, kompresif, moden sereta setipak enggau ungkup guna maya hari tu,” ku iya.
Iya bela nerangka UKAS diatu benung ba proses nambah manah sistem nyimpan data enggau kerejasama Unit Digitalisasyen Servis Perintah Sarawak (SCSDU) dikena nentu pengelikun siber ba tikas optimum.
Nengah inisiatif tu, ku iya, UKAS dipelaba ngerembai pengawa bekenaka teknologi pintar ba operasyen komunikasyen Perintah Sarawak, nyengkaum 'digital content management', automasi data sereta nyaga 'cloud data'.
Pengawa betemu tu mega meri awak berandau bekaul inisiatif teknologi dudi hari di UKAS setipak enggau tunga kuing transformasyen digital Perintah Sarawak nengah juluk ati PCDS 2030.-EDISI UKAS
Pemberita : Maryam Zanariah Ibrahim
Gambar : George
