KUCHING: Perintah Sarawak terus ransing negap ekosistem Pelajar Latih Teknikal enggau Vokasional (TVET) nengah nengkebang kar akademik universiti nengeri enggau semua politeknik sereta kolej vokasional di selampur Sarawak.
Sapit Menteri Pelajar, Inovasyen enggau Pemansang Penau Sarawak, Datuk Dr. Annuar Rapaee madah, pengeransing nya deka meri awak ti nyengala sereta muntangka nembiak diploma nampung pelajar ngagai renggat degree.
“Bulan Julai tadi, aku udah minta empat universiti nengeri iya nya Kolej Universiti ICATS, Universiti Teknologi Swinburne Sarawak, Universiti Curtin Malaysia enggau Universiti Teknologi Sarawak (UTS) ngambi numbuh kar akademik enggau semua politeknik sereta kolej vokasional di Sarawak.
“Pekara tu ngambika nembiak diploma nampung pelajar ngagai renggat degree nengah sistem mindah kredit,” ku iya maya bejaku ba Program Apresiasyen enggau Penyulut Kolej Vokasional Matang Taun 2025 di Dewan Sri Mutiara, Kolej Vokasional Matang ditu, Hari Empat.
Iya madah, pengawa nya besai amat reti ngambi kus ti disediaka universiti nengeri setipak enggau program di kolej vokasional enggau politeknik, lalu ngerandang peluang pelajar ti nyengala ungkup nembiak Sarawak.
“Aku deka minta universiti tu datai ke Kolej Vokasional Matang meri penerang ngagai nembiak bekaul peluang nampung belajar taun baru,” ku iya.
Datuk Dr. Annuar madah, Perintah Sarawak deka meda mayuh agi nembiak nampung pelajar nangkan diploma lalu enda ngetu naka nya aja.
Iya nerang, tu laban Perintah Sarawak deka nyendiaka pelajar tinggi enda bebayar ba empat buah universiti nengeri berengkah taun baru lebih agi ba bidang STEM, kelimpah skim bantu bukai ungkup raban nembiak.
Nitih ku iya, Perintah Sarawak udah nentuka kus di universiti setipak enggau kus di kolej vokasional enggau politeknik ngambi nembiak ulih nampung pelajar enggau mudah sereta bulih pemaik ari polisi pelajar pechuma ke disedia.
Iya ngarap raban nembiak beambi ulih enggau peluang tu enggau nyambung pelajar ngagai renggat tinggi agi ungkup dudi hari sida enggau pemansang nengeri Sarawak.
Bela datai Direktor Kolej Vokasional Matang Jamali Muhamad, Tuai Penulung Direktor Kanan Sektor Belajar Sathi Saravana Subramaniam, Sapit Pegawai Pelajar Pelilih Padawan Bolkiah Ali enggau Sapit Pegawai Pelajar Pelilih Kuching Ahat @ Salim Angas.-EDISI UKAS
Pemberita: Nur Nabilla
Gambar: Douglas Demong
