KUCHING: Sarawak deka nurai sejarah baru nengah pengawa ngaga siti agi padang bilun betikas dunya di Tanjung Embang, ti deka nyadi ikonik enggau kelai pemansang kandang menua tu nyadi status nengeri mansang manggai taun 2030.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, padang bilun nya digaga ngena konsep moden enggau teknologi moden ti ulih ngelaban Padang Bilun Antarabansa Kuala Lumpur (KLIA) ari gaya langkar, penyikar sereta pemeruan.

Ku iya, projek nya nyadi siti ari batang agenda infrastruktur besai nengeri ti deka digaga ba taun 2030.

“Model padang bilun tu bepelasarka langkar Padang Bilun Antarabansa Doha ti ngena konsep kompleks moden enggau perengka guna ti komprehensif.

"Projek tu mungkur pengawa ngaga dua jalai bilun, begunan besai, perengka guna IT teknologi moden sereta jalai tama betikas antarabansa,” ku iya.

Iya bejaku munyi nya ba Pengerami Genap Taun Injiniring Konsultant Bumiputera Sarawak (GJPBS) & Anugerah Injinir 2025 ditu, Hari Tiga tu tadi.

Nambah ke jaku iya, Datuk Patinggi Abang Zohari madah, projek besai nya begunaka servis konsultant enggau pengelandik injiniring ketegal enda ulih digaga semina siti kontraktor aja.

“Padang bilun tu ukai semina terminal penerebai bilun, tang siti begunan kompleks ke disikap enggau macham perengka guna.

"Enti udah tembu ila, iya deka nyadi padang bilun pemadu manah di Malaysia enggau perengka guna moden agi ari KLIA,” ku iya nerang.

Sama datai, Chairman GJPBS, Ir. Irwan Zulkarnain Datuk Mohd Hasbie.-EDISI UKAS

Pemberita: Grace John Lee
Gambar: Hazrin Sunaini