CHENGDU: Penemuai gawa deligit Sarawak ngagai Kandang Menua Sichuan betuai ke Sapit Premier Sarawak Datuk Amar Douglas Uggah Embas ditampung enggau penemuai basa sereta program penerang teknikal ke diatur Opis Pengangkut Kandang Menua Sichuan, Hari Dua tu tadi.
Deligit Sarawak disambut Sapit Tuai Direktor Opis Pengangkut Kandang Menua Sichuan, Wang Maokui enggau raban direktor ke bukai.
Maya nya, Opis Pengangkut Kandang Menua Sichuan bejuraika tanggungpengawa, penyulut sereta inisiatif strategik opis ngaga merambu, ngaga sereta ngatur rentayan pengangkut jalai enggau ai ba selampur menua nya.
Sichuan diatu bisi jalai alun pemadu panjai di China iya nya 418,000 kilometer jalai besai nyengkaum 369,000 kilometer jalai menua pesisir enggau 10,310 kilometer jalai besai ekspres.
“Pemujur Sichuan ngaga rentayan jalai alun ti besai sereta diaku ba renggat antarabansa di kandang menua bebukit meri penemu ti berega ngagai Sarawak ke benung ngenegap agenda pemansang infrastruktur nengah Strategi Pemansang Udah COVID-19 (PCDS) 2030,” ku iya.
Raban bekuasa Sichuan bela bekunsi langkar perambu sida ngempung pengawa bekenaka Building Information Modelling (BIM), Geographic Information Systems (GIS), sereta perengka nisih bepelasarka Artificial Intelligence (AI) dikena nentu, melaba sereta ngurangka penanggul geologi sereta rampa menua.
Datuk Amar Douglas Uggah ke mega Menteri Infrastruktur enggau Pemansang Penyangkai Kapal madah, Sarawak bisi ati belajar ke sistem ngatur ekologi komprehensif Sichuan, lebih agi ba pekara atur pengangkut, mekanisme ti nyukung industri sereta ngintu rampa menua bepelasarka teknologi.
"Penemuai tu nyungkakka pengeransing Sarawak betatika jalai pemansang ti sebela entara bekenaka teknologi moden enggau ngintu rampa menua.
"Kitai ngarap ulih negap kerejasama enggau Sichuan dikena ngemansangka infrastruktur ti meruan, pintar sereta tan ungkup pemaik rayat," ku iya nerang.
Deligit Sarawak bela dibai ngabas taba jalai alun ekspres sereta meda penerang silik bekaul sistem perambu, teknologi ngaga enggau langkar kereja ngintu rampa menua Sichuan. -EDISI UKAS
