KUCHING: Perintah Sarawak udah besetuju ngungkupka taba 15 ekar pemesai dikena ngaga palan pemansik Universiti Teknologi Swinburne Kampus Sarawak, seriris enggau pengeransing ke deka nempa Sarawak nyadi hab pansik kuasa ulih dikena baru enggau teknologi moden.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa ngaga palan tu sebagi ari inisiatif strategik dikena ngadaka modal mensia bepengelandik ti ulih ngatur pengeraja asal ba Sarawak dalam kandang 25 taun deka datai.

“Udah tentu, Perintah Sarawak deka meranak puku ba pengawa ngaga palan pemansik tu ke disikap enggau perengka moden.
.
“Tuju palan nya dikena nisih semua pun pengeraja asal ke bisi lalu digaga nyadi produk ti bekualiti tinggi ngena teknologi pemadu baru,” ku iya.

Iya madah munyi nya maya bejaku ba Pengerami Makai Lemai Gala Genap Ke-25 Taun Swinburne Sarawak di Palan Konvensyen Borneo Kuching (BCCK) ditu, Hari Dua tu tadi.

Iya ke mega Pro-Chanselor universiti nya madah, palan pansik tu deka nyadi pelasar alai mansik kuasa gadung sereta sektor teknologi moden nyengkaum satelit, dron enggau aeroangkasa.

Iya andal enggau pengelandik sereta pengeraja asal menua, Sarawak ulih ngadaka rebak baru bepenemu ba bidang kuasa enggau teknologi moden.

Sama datai, Sapit Premier Sarawak Datuk Amar Profesor Dr Sim Kui Hian, Sapit Menteri Pelajar, Inovasyen enggau Pemansang Penau Sarawak Datuk Dr Annuar Rapa’ee, Sapit Menteri ba Opis Premier Sarawak (Pengereja Kasar, Imigresyen enggau Matau Projek) Datuk Gerawat Gala, Chairman Kaunsil Direktor Universiti Teknologi Swinburne Kampus Sarawak Datuk Amar Jaul Samion, Direktor Yayasan Sarawak Datu Mohamad Junaidi Mohidin sereta temuai dipebasa ke bukai. -EDISI UKAS

Foto : Hazrin Bin Sunaini