BANDAR SERI BEGAWAN: Projek Rimbunan Kaseh (RK) Sundar Lawas mandangka pengeran Perintah Sarawak nentuka pemansang ekonomi dia dipejalai sebela, inklusif enggau besai empas, kelebih agi ba kandang menua pesisir.
Sapit Premier Sarawak, Datuk Amar Awang Tengah Ali Hasan madah, projek di baruh Program Transformasyen Menua Pesisir (RTP) nya deka nyadi penyungkak pemansang ekonomi di Lawas, kelimpah ngerandang peluang besai agi ngagai komuniti ngaul diri ba aktiviti betanam betupi moden enggau bepuguka teknologi.
“Kitai deka meda rayat menua pesisir nyadi sebagi ari arus pemansang.
"Nengah projek baka tu, kitai ukai semina nambah asil ekonomi aja, tang mega ngubah chara idup komuniti ngena chara betanam betupi moden enggau meruan,” ku iya.
Iya nyebut pekara nya ba Pengawa Nyua Sempekat Semaya (MoA) projek nya di Opis Dagang enggau Dagang Temuai Sarawak di Brunei Darussalam (STATOB), ditu, Hari Dua.
MoA nya ditanggam entara Kaunsil Pemansang enggau Pengintu Tanah (LCDA) Agri Business Sdn. Bhd. enggau Sahamada Corporation Sdn. Bhd., lalu dikemata Datuk Amar Awang Tengah begulai enggau Menteri Pengeraja Asal enggau Dagang Temuai Brunei Darussalam, Dato Seri Setia Dr Abdul Manaf Metussin.’
Menteri Dagang Antarabansa, Industri enggau Meranak Puku madah baru, kaul sektor kompeni beguna endar nentuka Projek RK Sundar ulih mansang.
Ku iya, Perintah Sarawak ngaga polisi ti nyengala enggau ngemuntangka projek, seraya sektor kompeni patut nyadi raban ti gawa ke pemansang.
“Ngenang projek tu, infrastruktur udah bisi. Aku meda ari terubah projek dilanggur, lalu ngemansangka projek tu begunaka sektor kompeni.
“Ngarap ke projek tu mujur, lalu aku andal tu deka meri empas positif ngagai komuniti,” ku iya nyemetak.
Sama datai, esuruhjaya Tinggi Malaysia ke Menua Brunei Darussalam, Datuk Mohd Aini Atan, Menijar Besai LCDA, Datu Sr. Zaidi Mahdi, Tuai Pegawai Eksekutif STATOB, Samat Junai, Penyanding Penemu Sahamada Corporation Sdn. Bhd., Illias Matusin, Kaban Kunsil Nengeri (ADUN) Batu Danau, Dato Paulus Palu Gumbang sereta temuai dipebasa bukai.-EDISI UKAS
Pemberita: Leya Ameera Annuar Rigos
Gambar: Shairazi
