BANDAR SERI BEGAWAN: Kaul dagang entara Sarawak enggau Brunei Darussalam terus ngerembai tegap lebuh asil dagang ngerikod RM3.39 bilion taun 2024, lalu mandangka pengandal pemeranak puku ngagai pengulih ekonomi Tanah Kenyalang ba renggat serantau enggau antarabansa.
Sapit Premier Sarawak, Datuk Amar Awang Tengah Ali Hasan madah, asil nya nunjukka kaul rat ekonomi ti majak tegap entara Sarawak enggau Brunei Darussalam, dibanding penyampau semua dagang luar nengeri tu ti manggai RM198.7 bilion ba taun sama.
Ku iya, penyampau dagang ti majak nambah nya mandangka pengerapit kaul kerejasama ekonomi entara Sarawak enggau Brunei Darussalam, lalu nambah pengandal ngagai Sarawak terus nyadi palan meranak puku ti strategik, ukai semina ba tikas nasional aja tang antarabansa.
“Sarawak tu entara palan meranak puku ti pemadu tebilang di Malaysia, enggau kitai terus merambu meranak puku ti meruan sereta inovatif ti deka mai pemaik besai ngagai rayat kitai enggau ekonomi menua,” ku iya.
Iya nyebut pekara nya ba Pengawa Nyua Sempekat Semaya (MoA) projek nya di Opis Dagang enggau Dagang Temuai Sarawak di Brunei Darussalam (STATOB) ditu, Hari Dua.
MoA nya ditanggam entara Kaunsil Pemansang enggau Pengintu Tanah (LCDA) Agri Business Sdn. Bhd. enggau Sahamada Corporation Sdn. Bhd., lalu dikemata Datuk Amar Awang Tengah begulai enggau Menteri Pengeraja Asal enggau Dagang Temuai Brunei Darussalam, Dato Seri Setia Dr Abdul Manaf Metussin.’
Datuk Amar Awang Tengah ti mega Menteri Dagang Antarabansa, Industri enggau Meranak Puku madah baru, Brunei Darussalam bisi penuduk nyadi pintu penama ngagai makit sedandang agi, seraya Sarawak nyendia pemansut asal ti mayuh sereta pengereja landik.
“Brunei ngembuan ekosistem dagang ti entap enggau polisi pekara wang ti tegap. Sarawak kaya enggau pemansut asal, pengereja dilatih enggau politik tegap. Begempung, kitai ulih negap pemansang ekonomi,” terang iya.
Kelimpah ari sektor dagang, Datuk Amar Awang Tengah mega nyemetak madah pengulih besai kerejasama kuasa gadung, seriris enggau pengeran kededua raban ba agenda pemeruan enggau kuasa ulih dikena baru ti majak nerima perati ba tikas global.
Iya nyemetak madah, kerejasama entara Brunei Darussalam enggau Malaysia, kelebih agi Sarawak, patut dikerembai ke sektor-sektor baru ti bisi nilai ekonomi tinggi enggau pengulih besai dudi hari.
“Ari kaul sejarah enggau budaya ti rat sereta semangat begulai, aku andal ke kerejasama tu deka terus meri mayuh pemaik, ukai semina ari sukut ekonomi aja, tang mega negap kaul rayat enggau pemansang serantau,” ku iya.
Pengawa nya mega digulu Pesuruhjaya Tinggi Malaysia ke Menua Brunei Darussalam, Datuk Mohd Aini Atan, Menijar Besai LCDA, Datu Sr. Zaidi Mahdi, Tuai Pegawai Eksekutif STATOB, Samat Junai, Penyanding Penemu Sahamada Corporation Sdn. Bhd., Illias Matusin, Kaban Kunsil Nengeri (ADUN) Batu Danau, Dato Paulus Palu Gumbang sereta temuai dipebasa bukai.-EDISI UKAS
Pemberita: Leya Ameera Annuar Rigos
Gambar: Shairazi
