KUCHING: Perintah Sarawak udah meri lebih RM37 juta naka September taun tu ungkup servis enggau bantu ngagai orang tuai nengah bemacham inisiatif.
 
Direktor Opis Pengintu Pengelantang Mensia Mayuh (JKM) Sarawak Semawi Mohammad madah, nya dikena melanja inisiatif Perintah Sarawak nyengkaum Bantu Pengerai Orang Tuai (SCHB), bantu pengerai baka pengawa nyaga khas pesakit tungkul sengayuh, bantu kereban bantu enggau ke bukai.
 
“Tu nunjukka orang tuai dibantu ukai pengawa pengasih aja, tang nyadi tanggungpengawa kitai enggau Perintah Sarawak deka terus ngemudi misyen tu, nempa komuniti ti mansang tuai ukai tating tang lambang basa,” ku iya.
 
Iya nibar ke haku nya lebuh mantaika polisi Sarawak serimbai ‘Sarawak International Conference on Ageing’ (SICA) 2025, ditu, Hari Dua.
 
Kelimpah bantu nya, iya nerang ke Rumah Sri Kenangan (RSK) mega meri endur diau ti lantang ngagai orang tuai di Sarawak, kelebih agi sida ti nadai kaban belayan, nadai kereja tauka endur diau.
 
“Di Sarawak, bisi dua RSK diatu udah dibuka ke alai RSK Kuching nyaga 60 orang tuai ti patut seraya RSK Sibu endur 32 orang tuai ti nadai endur diau.
 
“Tetiap RSK bisi nyendiaka genap servis nentuka pengelantang batang tubuh, runding enggau sosial sida ti diau dia, nyengkaum berubat enggau bantu pengerai, terapi kereja, nyaga 24 jam, nyuman sida ti tasah, servis ngembing enggau kaunseling, sereta aktiviti profesional enggau sosial ti ngaul sida diau dia,” ku iya. -EDISI UKAS