KUCHING: Sarawak nyadi entara nengeri ti ngerikod umur peranak ngelui ari tikas nasional seriris enggau tikas pengerai enggau pengelantang rama rayat nambah, begulai enggau tiga da nengeri iya nya Selangor, Wilayah Persekutuan Kuala Lumpur enggau Wilayah Persekutuan Labuan.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, data nya nunjukka Malaysia diatu deras agi nuju status rayat mansang tuai ti begunaka pengawa besikap ari sukut rama, ekonomi enggau pengerai ngambi pengelantang orang tuai terus diintu meruan.
Ku iya, bisi 30 ari 156 daerah di Malaysia udah ngelui ari tikas umur nasional, enggau melaba umur pemadu panjai sida lelaki dirikod di Kinabatangan, Sabah (79.8 taun), seraya indu di Telupid, Sabah (82.8 taun).
“Seraya ba pelilih menua di Sarawak, Kota Samarahan, ambi ke banding, umur lebuh ada terus nambah entara 79.8 taun dirikod 2023, 80.4 taun 2024, enggau 80.9 taun 2025, pemadu tinggi di menua.
“Lalu timpuh umur pemadu pandak dirikod di Kanowit, 66.5 taun manggai 2025,” terang iya.
Dato Sri Fatimah nerang pekara nya ba pengawa bejadi Sarawak International Conference on Ageing (SICA) 2025 ditu, Hari Dua.
Iya madah baru, perintah nengeri ngaku pekara nyata nyadi lalu benung ngatur pengawa nengah kerejasama enggau agensi strategik, raban bekuasa lokal sereta bakih komuniti dikena negap sistem bantu enggau nyendiaka peluang ti ngasuh orang tuai di nengeri tu ulih idup regas, likun enggau lantang.
"Kenyalang Gold Card (KGC) meri diskaun khas, pemaik enggau akses ba servis ti mantu ngelempung tating belanja sida, seraya Bantu Pengerai Orang Tuai (SCHB), skim penyampau RM50 juta nya nyendiaka perubat nadai ngena mata duit nyentuk RM500 setaun di lebih 290 klinik panel di selampur Sarawak.
“Ba bantu belanja idup, orang tuai mega nerima Pemeri Bantu Pemun Sarawak (SKAS), iya nya bantu belanja ninting taun entara RM250 ngagai RM800,” ku iya.
Pengawa nya mega digulu Sapit Premier Sarawak ti ngari ke Premier Sarawak, Datuk Amar Profesor Dr Sim Kui Hian, dua Sapit Menteri Pemansang Indu, Nembiak Mit enggau Pengelantang Komuniti Sarawak, Datuk Rosey Yunus enggau Datuk Mohammad Razi Sitam; Sekretari Mendam KPWK, Datu Felicia Tan Ya Hua; Direktor Opis Pengintu Pengelantang Mensia Mayuh Sarawak, Semawi Mohamad sereta temuai dipebasa bukai.-EDISI UKAS
