KUCHING: Perintah Persekutuan dipinta lurus agi magi belanja projek pengerai di Sarawak, baka dipejalai ba nengeri bukai di Malaysia.
 
Sapit Premier Sarawak, Datuk Amar Profesor Dr Sim Kui Hian madah, agi bisi pengawa enda sebela lebuh magi belanjar projek pengerai besai di kandang menua tu dibanding di nengeri bukai, nyengkaum projek ngaga Hospital Riman Sarawak.
 
“Ambi ke chunto, Hospital Riman Utara di Alor Setar ti ngembuan 200 katil digaga ngena ungkus RM906 juta lalu semua nya dipelanja Perintah Besai.
 
“Nya alai, nama kebuah lebuh datai di Sarawak, kitai dipinta mayar dulu?” ku iya.
 
Iya nibar ke jaku tanya nya lebuh dirandau pemberita pengudah ngari ke Premier Sarawak bejadika Sarawak International Conference on Ageing (SICA) 2025 ditu, Hari Dua.
 
Menteri Pengerai Mensia Mayuh, Pengawa Berumah enggau Perintah Lokal Sarawak nya madah, rayat Sarawak mega rayat Malaysia ti bisi hak ngasai perengkaguna enggau infrastruktur pengerai sebaka enggau nengeri bukai.
 
Iya nerang, bala Kaban Parlimen Sarawak mega patut sama bejaku ke pekara tu tikas nasional ngambi bulih perati ti patut ari Perintah Besai.
 
Berebak enggau nya, iya madah ke Sarawak chukup betuah laban bisi tuai bepenau baka Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti seruran betatika rayat enggau bejalaika inisiatif mayar projek Hospital Riman ngena belanja nengeri.
 
 “Laban Perintah Besai enggai meri agih  belanja lalu kitai nyau enggai ninga kelalu mayuh dalih ti madah ‘nadai duit’, tang rayat Sarawak mega bisi ditepan sakit riman.
 
"Premier kitai bejalaika inisiatif ke alai iya setuju ke Perintah Sarawak deka mayar dulu projek Hospital Riman beungkus RM1 bilion lalu Perintah Besai deka mulai ke bayar nya ila,” ku iya.-EDISI UKAS