KUCHING: Program embing tumu kereja ungkup nembiak Pom 5 enggau Pom 6 patut diatur mayuh agi dikena nentuka peminta pengereja profesional di Sarawak ulih ditangkup, kelebih agi ba bidang digital, kuasa ulih dikena baru enggau teknologi baru.
 
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, inisiatif nya deka mantu nembiak milih kus dipejalai ti setipak enggau tunga kuing pemansang nengeri,
 
Ku iya, peminta pengereja pakar ba bidang digital, teknologi pemadah (IT), kuasa ulih dikena baru (renewable energy) sereta artificial intelligence (AI) majak nambah seriris enggau pengawa perintah numbuh institut AI di Sarawak.
 
“Mayuh anak Sarawak masuk universiti, tang bisi sekeda milih kus ti enda setipak enggau peminta makit kereja di nengeri tu.
 
“Kitai deka ke sida diembing tumu ngambi bidang dipilih sida betul sereta relevan enggau peluang kereja di Sarawak,” ku iya madah ngagai pemberita ba Pengerami Nangguh Program Pemadah enggau Nerang Isu Kemaya Hari ditu, Hari Dua.
 
Iya mega merambu siti institut khas ditumbuh ungkup nembiak Pom 6 laban chara pelajar raban nya bebida ari nembiak sekula sekondari bukai.
 
Pengawa nya, ku iya, begunaka kerejasama entara perintah nengeri, Opis Menteri Pelajar enggau Yayasan Sarawak dikena nentuka pejalai projek berurun agi.
 
“Chara belajar Pom 6 bebida enggau sekula sekondari bukai, nya kebuah patut bisi program ngembing khas ngambi sida tuai agi runding maya ngaga pemutus,” ku iya.
 
Datuk Abdullah mega madah, embing kereja tumu beguna endar dikena napi jeman pelajar pechuma di universiti diempu Perintah Sarawak belabuh taun baru, ngambi nembiak endang milih kus ti tetangkupka peminta sektor kereja nengeri tu.
 
Sama datai, Pegawai Pelilih Kuching, Zaidi Sharkawi, Sapit Direktor Unit Komunikasi Awam Sarawak, Mohamed Faizal Shah Ali enggau Direktor Palan Pematih Pengajar (IPG) Kampus Batu Lintang, Dr Abang Ismail Abang Juhi.-EDISI UKAS
 
Pemberita: Grace John Lee
Gambar: Ibanez Jeffery Guang