KUCHING: Kaul komuniti renggat baruh enggau nembiak universiti beguna endar nyaup perintah nengeri nampung penerang betul pasal polisi enggau inisiatif pemansang ti dipejalai di Sarawak.
 
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, pengawa nya ulih nentuka jaku tesau perintah datai enggau betul sereta reti ditemu serap komuniti.
 
Ku iya, tuai raban bansa enggau tuai komuniti, pengajar enggau nembiak diperansang nyadi mata enggau pending perintah ti nyaup nerang isu ti nyadi sereta nampung penerang betul ngagai komuniti sida empu.
 
“Program tu sebagi ari inisiatif Unit Komunikasi Awam Sarawak (UKAS) ungkup bekunsi penerang enggau besilih penemu ngambi perintah ulih ngadu enggau nusun baru polisi nitih peneka komuniti,” ku iya lebuh bejaku ba Pengerami Nangguh Program Pemadah enggau Nerang Isu Kemaya Hari ditu, Hari Dua.
 
Datuk Abdullah taja ukai semua pekara ulih dipadah silik ngagai komuniti, program baka nya nyadi pelasar besai nentuka polisi perintah ditemu reti enggau terang agi, kelimpah ningkah penemu ngasuh saru tauka penerang ti enda betul ti dikerembai ba media sosial.
 
Program nya mega digulu mayuh komuniti nyengkaum nembiak palan pelajar tinggi enggau bala tuai renggat baruh ti ransing mantu negap kaul komunikasyen entara perintah enggau rayat.
 
Sama datai, Pegawai Pelilih Kuching, Zaidi Sharkawi, Sapit Direktor Unit Komunikasi Awam Sarawak, Mohamed Faizal Shah Ali enggau Direktor Palan Pematih Pengajar (IPG) Kampus Batu Lintang, Dr Abang Ismail Abang Juhi.-EDISI UKAS
 
Pemberita: Grace John Lee
Gambar: Ibanez Jeffery Guang