KUCHING: Sarawak Skills ukai semina institusyen latih teknikal aja, tang meransang pemansang TVET, inovasyen enggau pengawa dagang teknikal di Sarawak.
 
Chairman Sarawak Skills, Tan Sri Datuk Amar (Dr.) Abdul Aziz Dato Husain madah, Sarawak Skills udah mansang nyadi institusyen latih besai empas ti ukai semina nempa pengereja landik aja, tang mega nempa rebak nembiak bisi inovatif, disiplin enggau besemekih tikas global.
 
“Sarawak Skills ukai semina matih ari sukut pengelandik teknikal, tang mega nempa nembiak ngambi ngembuan pengelandik nyadi mensia, semangat inovasyen enggau nilai profesionalisme tinggi,” ku iya lebuh bejadika Karnival Inovasyen TVET enggau Hari Nerima Penatai Mensia Mayuh 2025, serimbai Pengerami Konvokesyen Ke-27 Sarawak Skills ditu, Hari Dua.
 
Iya madah baru, pengawa ngatur Hari Nerima Penatai Mensia Mayuh enggau Karnival Inovasyen TVET mandangka baka ni pengawa ngaul pengelandik terus nerima perati komuniti, lalu negap kaul entara nembiak, pengajar. industri sereta komuniti dia.
 
“Program baka tu beguna endar dikena mandangka asil kereja enggau kreativiti nembiak TVET ngagai mensia mayuh, kelimpah ngerandang peluang kerejasama baru enggau raban industri,” terang iya.
 
Iya mega meri terima kasih ngagai komiti pengatur ti mujur ngatur program besai nya, sereta ngarap ke program nya ditandu ninting taun dikena narak semangat inovasyen enggau penyerakup raban Sarawak Skills.
 
Pengerami nya mega digulu Mandal Chairman Kaunsil Pengatur Sarawak Skills, Norazibah M. Rabu.-EDISI UKAS