KUCHING: Perintah Sarawak deka niri ke hospital khas ungkup perubat riman nyengkaum riman tusu lebuh projek ngaga palan nya udah dikemendar Perintah Besai.

Sapit Menteri ba Opis Premier Sarawak (Undang-Undang, MA63 enggau Kaul Nengeri – Perintah Besai), Datuk Sharifah Hasidah Sayeed Aman Ghazali madah, projek niri ke hospital nya entara pengawa seruran ditandu perintah dikena negap pelin strategik nasional ungkup mutar penyakit riman di Malaysia.

“Enti perintah ngaga endang mayuh hospital riman didiri di selampur Malaysia enggau di Sarawak, Insya-Allah deka niri hospital riman nyengkaum riman tusu.

“Udah dikemendar, bajet udah bisi, semina nganti didiri aja,” ku iya bejaku ba mua mayuh ba Pengerami Pink High Tea diatur Pink Ribbon Support Group Sarawak di Grand Margherita Hotel, ditu, Hari Minggu.

Ku iya, projek hospital riman nya sebagi ari pengeran perintah gawa nengah National Strategic Plan for Cancer ti digaga Opis Menteri Pengerai Malaysia (KKM) dikena nentuka rayat bulih akses perubat enggau ngenuku tumu semua penerang tikas pengerai.
.
Berebak enggau nya, Datuk Sharifah Hasidah mega nyemetak madah ke pemesai guna nambah penenmu enggau beperesa tumu riman tusu ba raban indu, kelebih agi ba menua pesisir, dikena nagang tumu ti ulih ngidupka nyawa.

“Rugi endar enti indu kitai, kelebih agi sida di menua pesisir, enda nemu pasal pengawa beperesa baka mamogram.”

“Agi tubah sida ti beumur 50 taun enggau tuai agi apin nganjung diri ngaga mamogram, taja tu beguna endar dikena nyidi tumu,” ku iya.

Pengerami nya mega richah enggau licha ngena pejuluk “BSC vs Mastectomy in the Management of Breast Cancer” dikenatai Dr. Rokayah Julaihi, Consultant General Surgeon ti anda penemu ba pengawa beputung tusu.

Datuk Sharifah meransang gempung ukai dikuasa perintah (NGO) enggau agensi perintah negap pengawa begulai nengah program meri penemu enggau beperesa tumu dikena nentuka mayuh agi indu nerima pemaik enggau penemu pasal nagang riman tusu.-EDISI UKAS

Pemberita: Betrice Britney Dee
Gambar: Betrice Britney Dee