SARIKEI: Pengerami Jubli Emas 50 Taun Genturung Pendiau narak semangat penyerakup ba Sarikei nengah Program Narak Penyerakup ti diatur ba Balai Palan Aktiviti Penyerakup Sarikei, kena malam Hari Lima.

Pengerami diatur Komiti KRT Bagi Menua Sarikei nya udah dipenyadi Direktor Opis Penyerakup Bansa enggau Integrasyen Nasional (JPNIN) Nengeri Sarawak, Dirwana Azool.

Iya nyemetak madah, Genturung Pendiau mengkang nyadi pelasa beguna mekuh penyerakup enggau pengelikun menua.

“Genturung Pendiau ukai semina lambang pengelantang rayat mayuh tang mega pelasar ngempung rayat ti semampai nambah enggau mansang nitih pekara ti nyadi diatu,” ku iya bejaku bejadi pengerami nya.

Iya mega madah, kenyau ari ditumbuh ba taun 1975, Genturung Pendiau udah nengah lima renggat transfomasyen nyengkaum ngerembai pangku pengawa ngagai aktiviti ngaul komuniti, pemansang ekonomi komuniti lalu neleba ngena pemansang teknologi moden.

Ku iya agi, perintah terus meri sukung ngagai inisiatif ti dipejalai nengah Genturung Pendiau dikena mekuh semangat enggau ngemanah kualiti idup komuniti nengah mayuh program sosial, ngintu pengelantang enggau ekonomi.

Mayuh aktiviti bepelasarka penyerakup enggau budaya mega diatur dikena nempa komuniti ti lantang, seati enggau lantang. - EDISI UKAS