KUALA LUMPUR: Perintah Sarawak enggau Jepun terus negap kaul kerejasama ba sektor kuasa gadung, bekal kuasa ti tegap sereta program besilih nembiak entara kededua raban.
Duta Besai Jepun ke Malaysia, Shikata Noriyuki madah, nengah dipegai Menteri Besai baru Jepun, Sanae Takaichi, kaul enggau Sarawak disadang terus mansang enggau meri pemaik begulai.
“Nengah dipegai Menteri Besai Jepun ti baru, Takaichi, kaul entara Jepun enggau Sarawak deka terus mansang nyengkaum ba bekal kuasa ti tegap, pemansang gadung sereta inisiatif ngelaku pengawa besilih nembiak entara Jepun enggau Sarawak,” ku iya.
Iya madah munyi nya lebuh dirandau pemberita pengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba Palan Dagang enggau Pemandang Antarabansa Malaysia (MITEC), ditu kena Hari Enam.
Shikata madah, Jepun diatu benung chakah bejalaika bemacham projek idar pemansang gadung nyengkaum inisiatif hidrogen kelimpah nampung bekal gas asli cecair (LNG) ari Bintulu.
“Nya kebuah, kami berandau ke mayuh projek meranak puku baru ti engka datai ari Jepun ke Sarawak.
“Udah tentu, kitai meseti nanggam kerejasama rat agi entara sektor perintah enggau sektor peribit,” terang iya.
Nambah ke nya, iya madah ke Sarawak nyadi palan meranak puku ti bisi pengulih besai berindik ari polisi progresif ti dipejalai Datuk Patinggi Abang Zohari ungkup teknologi baru.
“Mayuh serikat Jepun bisi penau ba teknologi gadung ti engkeman dikemansang ba Sarawak.
“Ba konteks ‘Asia Zero Emission Community’ (ASEC), Sarawak bejalaika tanggungpengawa besai berindik ari pengelebih ba kuasa hidro ti majak nambah,” ku iya baru.
Nangkan nya, iya nerang ke Jepun enggau Sarawak deka terus ngiga chara pemadu manah ngena pemansut kuasa gadung enggau naka pemanah ungkup pemansang baruh karbon ba rantau tu.
Bela datai ba penemuai basa iya nya Sapit Premier Sarawak ti mega Menteri Dagang Antarabansa, Industri enggau Pengawa Meranak Puku Sarawak, Datuk Amar Awang Tengah Ali Hasan. -EDISI UKAS
Pemberita: Jonnie Kiew
Gambar: Ameerul Syafiq Khir
