KUALA LUMPUR: Sarawak terus mekuh kaul begulai enggau rayat iya ba Semenanjung nengah pengawa ngatur Sarawak Ekspo ti dilanchar dikena ngepun program ninting taun Lan Berambeh Anak Sarawak (LBAS) 2025.

Sapit Menteri Besai ti mega Penyanding Penemu Komiti Besai LBAS 2025, Datuk Amar Fadillah Yusof madah ke Sarawak Ekspo ukai semina palan pemandang tang mega pelasar interaktif ti nentuka anak Sarawak ngulihka penerang pemadu baru pasal kuing tuju enggau polisi pemansang nengeri.

“Rebut mih peluang ngulihka semua penerang enggau penerang bekaul polisi sereta perambu Perintah Sarawak dikena ngemansang kandang menua enggau rayat," ku iya ba aum pemberita pengudah ngelanchar Sarawak Ekspo di Palan Dagang enggau Pemandang Antarabansa Malaysia (MITEC), ditu kena Hari Enam.

Sarawak Ekspo mandang 89 reruai ngaul mayuh opis menteri, agensi perintah, institusyen pelajar sereta serikat bekaul perintah (GLC) Sarawak, dibagi nitih kluster kuasa ulih dikena baru, ekonomi, pelajar enggau kereja kelimpah pemandang interaktif pasal inisiatif digital enggau gadung nengeri.

Sapit Menteri Pemansang Genturung Pendiau enggau Kandang Menua ti mega Chairperson Komiti Pemansang enggau Bejual, Datuk Rubiah Wang madah, inisiatif bisi kluster tu nentuka pengusung berati ke penerang enggau muntang sereta silik agi.

Sama datai ba pengawa ngelanchar iya nya Menteri Kereja Raya ti mega Chairman Komiti Besai LBAS 2025 Dato Sri Alexander Nanta Linggi, Menteri Pemansang Indu, Ruang Bilik enggau Komuniti Dato Sri Nancy Shukri, Sapit Menteri Pengerai Dato Lukanisman Awang Sauni, Sapit Menteri Ekonomi Dato Hanifah Hajar Taib, Sapit Menteri Pengeraja Asal enggau Pemeruan Rampa Menua Dato Sri Huang Tiong Sii, Sapit Menteri Digital Datuk Wilson Ugak Kumbong sereta temuai dipebasa bukai. -EDISI UKAS