SPAOH: Sebuah begunan ke dikemanah di Spaoh deka digaga nyadi Palan Giat Mara dikena nyediaka awak pelajar teknikal ungkup raban nembiak ba sitak nya.
Sapit Premier Sarawak, Datuk Amar Douglas Uggah Embas madah, Palan Giat Mara nya deka dipunka enggau kus electrical wiring enggau teknologi begunan bepelasarka bata.
Ku iya, sida udah nentuka penyampau dikena ngemanahka infrastruktur palan nya lalu dipelabaka berengkah bulan Julai 2024.
Iya ke mega Kaban Kunsil Nengeri (ADUN) Bukit Saban minta bala nembiak beambi ulih enggau latih ke disedia ba palan nya.
Datuk Amar Douglas bejaku munyi nya maya ngabas taba projek ngemanahka begunan nyadi Palan Giat Mara di Spaoh, Hari Dua.
Kelimpah ari nya, iya enggau Ejensi Pemansang Sitak Betong (BDDA) ngemataka pengawa nyuaka taba projek ngemanahka jalai ladang getah enggau sawit di kebun china Spaoh ngagai kontraktor ke beungkus sepenyampau RM388,000.
Ba hari ke sama, Datuk Amar Douglas bela ngabas sida ke tasah angus 28 March tu tadi.
Ku iya, Perintah Gabungan Parti Sarawak (GPS) semampai meri bantu ngaga rumah baru ungkup sida ke tasah angus beungkus maksimum rm70,000.-EDISI UKAS
