KUCHING: Sarawak terus nunjukka pengeran bejalaika pemansang teknologi Artificial Intelligence (AI) nipak inisiatif perintah nengeri nuju pemansang digital ti inklusif.
Pakar teknologi enggau inovasyen antarabansa, Dr. Ayesha Khanna, madah kediri temegah enggau muji Sarawak laban meri perati ngagai pemansang AI ti bisi etika sereta belalauka mensia.
“Aku chukup temegah enggau komitmen Sarawak ti ukai semina deka ngemansang data AI tang mega ngemerat tanggungpengawa ba atur pengawa nya. Tu mih aja chara mansang ke mua,” ku iya.
Iya madah munyi nya lebuh bekunsi penemu ngena pejuluk“Resilient by Design: Shaping Inclusive Futures in an AI-Driven World” serimbai Konferens Ekonomi Digital Antarabansa Sarawak (IDECS) 2025 ba Palan Konvensyen Borneo Kuching, kena Hari Empat.
Iya mega ngemerat pemujur transfomasyen digital ukai semina bepanggai ngagai teknologi tang ba penau sesebengkah nengeri nempa pengandal, etika enggau pengelandik rayat.
“Ukai semina beguna dikena nempa injinir AI ti landik tang mega nentuka rayat nemu chara gawa begulai enggau teknologi AI.
“Sida ti bisi peneleba gawa enggau AI bisi peluang ti besai agi bulih kereja,” terang iya.
Dr Ayeesha mega madah, pemansang pengereja pengawa bekaul AI mega meseti meri perati ngagai pelajar, latih enggau kolaborasyen enggau industri nentuka rebak biak ulih neleba kediri enggau ubah teknologi sereta ngena manah peluang gawa dudi hari.
Pakar nya mega andal ke terus ngulu pejalai Sarawak ba AI dudi hari nyadi siti ari chunto pemansang meruan ti jauh timpai. - EDISI UKAS
Pemberita : Betrice Britney Dee
Gambar : IDECS25
