KUCHING: Penuduk Sarawak ba agenda kuasa ulih dikena baru enggau ekonomi digital terus ditegap nengah pemansang‘Kota Petra Green Technology Park’ti deka nyadi entara palan teknologi gadung tebilang ba rantau tu.

Menteri Utiliti enggau Telekomunikasyen Sarawak, Dato Sri Julaihi Narawi madah, taman teknologi gadung pemesai 3,000 ikar nya deka dikemansang Kaunsil Ekonomi Digital Sarawak Berhad (SDEC) enggau mandang integrasyen digital ti ngempung kuasa solar besai kapasiti 300 megawatt sereta sistem nyimpan kuasa bateri 600 megawatt-jam.

“Sistem nyimpan kuasa nya deka mekal kuasa ngagai taba palan data bepelasarka Artificial Intelligence (AI) enggau industri beteknologi tinggi seraya ngentap penuduk Sarawak nyadi pengkalan industri gadung,” ku iya.

Iya madah munyi nya nengah pejuluk ‘Ethical AI and the Green Digital Economy: Sarawak’s Path to Regional Leadership in Utility and Telecommunication’serimbai Konferens Ekonomi Digital Antarabansa Sarawak 2025 (IDECS25) ba Palan Konvensyen Borneo Kuching (BCCK), ditu kena Hari Empat.

Iya ti mega Menteri Beempu Tanggungpengawa Ngatur IDECS25 madah, projek nya ba Petra Daya diatu nunjukka pemansang positif lalu disadang nyadi entara projek ti keterubah adap selatan Sarawak.

Nambah ke nya, Dato Sri Julaihi mega nerang ke pemansang nya deka digempung enggau ‘Sarawak Data Centre Park’ ti deka dikemansang nengah kuasa ulih dikena baru enggau Sarawak Energy Berhad (SEB) nyadi bakih kuasa besai.

“Taman tu deka digaga nitih standard antarabansa Tier 4 iya nya tikas pemadu tinggi ari sukut penyikar enggau pemanah infrastruktur data,” terang iya.

Ku iya, peminta palan data gadung, likun enggau diadu manah majak nambah ba serata ASEAN lalu Sarawak diatu ba penuduk strategik nangkup peminta nya.

“Rega Sarawak ti bendar ukai semina ba penau tang mega ba kredibiliti ngagai pemeranak puku, pemaju enggau perintah siti ekosistem ke alai pemeruan enggau etika bela dikemujur,” ku iya.

Sama datai, Chairman Kaunsil Ekonomi Digital Sarawak (SDEC), Tan Sri Datuk Amar Mohamad Morshidi Abdul Ghani, Menijar Besai Sarawak Multimedia Authority (SMA) Dato Dr Anderson Tiong Ing Heng enggau Tuai Pegawai Eksekutif SDEC Dato Ir Ts Sudarnoto Osman. -EDISI UKAS