SERIAN: Opis Tanah enggau Survei (JTS) udah nyukat kelingi tanah pemesai 1,217,766 hektar tauka 3.009 juta ikar tanah ba selampur Sarawak kenyau ari bejalaika inisiatif nyukat tanah adat belabuh dipejalai ba taun 2010 nyentuk 30 September tu tadi.

Sapit Premier Sarawak Datuk Amar Awang Tengah Ali Hasan madah, 938,342 hektar tauka 2.3 juta ikar udah mujur digazet ari penyampau nya.

Ku iya agi, perintah diatu mega ngazet Rizab Komunal Bumiputera Seksyen 6 Kanun Tanah Negeri (KTN) mungkur 12 lokaliti enggau penyampau 12,370.232 hektar sereta 36 genturung pendiau.

“Pengudah ngazet Seksyen 6, renggat kedua iya nya pengawa nyukat lot individu enggau ngeluar Surat Pala Tanah Seksyen 18 KTN benung chakah dipejalai ba selampur nengeri,” terang iya.

Iya madah munyi nya ba Pengawa Nyua Chek Pampas Tanah Gazet Rizab Komunal Bumiputera Seksyen 6 enggau Seksyen 18 Kanun Tanah Negeri (KTN) Bagi Menua Serian enggau Kuching ba Serian Conference Centre (SCC), kena Hari Tiga.

Ku Datuk Amar Awang Tengah, nyentuk 30 September 2025, bisi 105,344 lot individu udah disukat mungkur 125,703 hektar (310,618 ikar) enggau 34,122 lot udah dikeluar surat pala tanah mungkur 47,443 hektar (117,234 ikar).

Tang, iya nyemetak madah ke pengawa nyukat semina dipejalai nengah pemendar pengempu tanah lalu pengudah nadai laya.

Iya mega madah, kerejasama Tuai Raban Bansa enggau Tuai Komuniti (KMKK) sereta pengempu tanah beguna amat nentuka program tu enda tejanggal. - EDISI UKAS