SERIAN: Perintah Sarawak nerang sebarang pengawa ngempu tanah dipejalai perintah chara asi enggau nitih atur undang-undang nyengkaum pengawa mayar pampas ti setipak enggau rega tanah diatu.
Sapit Premier Sarawak, Datuk Amar Awang Tengah Ali Hasan madah, perintah enda kala ngambi tanah enggi perintah chara pechuma tang mega keran mayar pampas ti patut nitih ke pemesao enggau rega tanah nya diatu.
“Ambi ke chunto ba Kampung Tangga, pengawa ngempu tanah pemesai 20 hektar nya ungkup tuju ngaga stesyen mit karan ari Sarawak Energy Berhad (SEB).
“Pampas ti dibayar ngagai pengempu tanah nya penyampau RM9.8 juta,” ku iya lebuh Pengawa Nyua Chek Pampas Tanah Gazet Rizab Komunal Bumiputera Seksyen 6 enggau Seksyen 18 Kanun Tanah Negeri (KTN) Bagi Menua Serian enggau Kuching di Serian Conference Centre (SCC), kena Hari Tiga.
Ku iya agi, Perintah Sarawak kenyau ari suba udah ngaku hak Tanah Adat Bansa Asal (NCR) nengah Seksyen 18 KTN enggau atur pengempu meseti mantaika bukti ti chukup ngambi ngenuku.
Nambah ke nya, Datuk Amar Awang Tengah mega muji inisiatif Projek Dokumentasyen Tanah ti dipejalai Dayak Bidayuh National Association (DBNA).
Terang iya, projek tu disebut chukup mantu Opis Tanah enggau Survei (JTS) dikena ngerumban pengawa nyukat sereta ulih mutar laya tanah NCR ari sukut penentu adan menua enggau pengempu ungkup sitak komuniti Bidayuh ari Lundu nyentuk Serian.
“Inisiatif DBNA tu ngemuntang pengawa teknikal JTS enggau ngerumban pengawa ngaku hak ngempu ngagai tanah NCR,” ku iya.
Ba pengawa nya, bisi mega diatur inisiatif Tanggungpengawa Rama Korporat (CSR) ti ngemata lapan chek beungkus RM110,000 diserah mungkur tiga genturung pendiau iya nya Kampung Plaman Payang, Kampung Tanah Puteh enggau Kampung Sebemban.
Program CSR JTS nya inisiatif perintah begulai enggau pemegai lisin mineral dikena mantu mensia mayuh ti napi empas terus ari aktiviti kuari tauka ngeluyang.
Bela datai, Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn, Sapit Menteri Pengangkut Sarawak Datuk Dr Jerip Susil, Sapit Menteri Perambu Mengeri, Pengatur Tanah enggau Rampa Menua Sarawak Datuk Len Talif Salleh, Sapit Menteri Industri Pemakai, Komoditi enggau Pemansang Kandang Menua Sarawak Datuk Dr Martin Ben, Kaban Parlimen Serian Dato Sri Richard Riot Jaem, Kaban Kunsil Nengeri (ADUN) Tebedu Dr Simon Sinang Bada, Direktor JTS Datu Awang Zamhari Awang Mahmood, Menijar Besai Kaunsil Pemansang enggau Pengintu Tanah Sarawak (SALCRA) Datu Joseph Blandoi, Residen Bagi Menua Serian Caroline Cleophas Joseph enggau Penguasa JTS Serian Abdul Khalil Amit. -EDISI UKAS
