KUCHING: Sarawak deka mandangka pemansang deras ba industri kuasa beresi enggau semikonduktor ba ASEAN Summit Ke-47 kena 27 Oktober tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, madah, Menteri Besai, Datuk Seri Anwar Ibrahim, udah minta Sarawak bekunsi peneleba sereta penyulut nengeri ba pengawa ngemansangka dua sektor strategik nya.

"Menteri Besai udah minta aku bekunsi pemansang ti dijapai di Sarawak ba dua buah sektor besai tu ke nyadi sebagi ari ekonomi baru, iya nya kuasa beresi enggau semikonduktor, kelebih agi ngaul Artificial Intelligence (AI) nyadi penyungkak pemansang ba bemacham sektor ekonomi sereta meransang bekenaka teknologi AI," ku iya.

Iya madah munyi nya maya dirandau pemberita pengudah Pengawa Bejadi Konferens Ekonomi Digital Antarabansa Sarawak 2025 (IDECS25) di Palan Konvensyen Borneo Kuching (BCCK), Hari Tiga.

Datuk Patinggi Abang Zohari madah, Sarawak udah ngena elemen AI enggau semikonduktor sereta pengulih AI nya empu bepanggai enggau tanggungpengawa sereta langkar chip nyengkaum ngemansangka langkar chip kediri iya nya KETEQ.AI.

Nerang bekaul penatai Presiden Amerika Syarikat Donald Trump ngagai aum nya, iya ngarap penatai tuai dunya nya ulih mereti ke geopolitik rantau Asia-Pasifik.

"Klimet meranak puku teruga mimit berindik ari pejalai polisi chukai Donald Trump ke meri empas ngagai dagang enggau pengawa meranak puku ba rantau tu.

"Nya alai, aku ngarap raban tuai ASEAN ulih bejaku enggau pengelandik ngambi mutar penanggul ekonomi ketegal polisi chukai ti dipejalaika Donald Trump," ku iya.- EDISI UKAS

Pemberita: Ahmad Daniel Faiz
Gambar: Mohd Hisyam Arif