KUCHING: Jaku Malaysia enggau Inggeris diperati nyadi penyungkak penyulut rebak biak dikena nempa nembiak ti bepenemu, andal sereta besedia napi pemar dunya moden.

Menteri Pelajar, Inovasyen enggau Pemansang Sarawak, Dato Sri Roland Sagah Wee Inn madah, pengelandik ba dua jaku nya ukai semina negap identiti nembiak tang mega meri peluang belajar, kereja sereta komunikasyen global.

“Sarawak seruran beratika pemesai guna dua jaku nya iya nya Jaku Malaysia enggau Jaku Inggeris.

“Jaku Malaysia, bahasa nasional kitai ti nyadi kelai identiti, penyerakup sereta pesaka budaya.

“Pia mega Jaku Inggeris, siti utai ti dikena ba renggat global,” ku iya ba program nutup Premier of Sarawak Debate Challenge 2025, Hari Tiga.

Iya nerang, belaban penemu ngena dua jaku tu ukai semina pekit intelektual aja, tang kelai semangat Sarawak ti masa mayuh batang jaku sereta nerima penemu.

“Pekit tu siti pelasar strategik ti ngesan tanggungpengawa nempa rebak biak ngambi nyadi siku ti landik bejaku, andal sereta landik bejaku bemacham jaku,” ku iya.

Iya mega madah, nyemela pengelandik dua jaku nya, besai reti dikena nempa nembiak ti ulih berunding enggau chara ti beguna, bekomunikasyen enggau pengandal sereta besemekih ba renggat antarabansa lalu enda ngelengka asal budaya menua.

Berebak enggau nya, pengawa nyua perais ngagai pemenang Premier of Sarawak Debate Challenge 2025 bisi diatur ti ngempuru nembiak sekula sekondari ari selampur Sarawak.-EDISI UKAS

Pemberita: Betrice Britney Dee & Alezxandria Kapple
Gambar: Betrice Britney Dee & Alezxandria Kapple