KUCHING: Perintah Sarawak nengah Unit Pengarap Bukai (UNIFOR) ngungkup belanja sepenyampau RM35.77 juta dikena ngaga 107 projek rumah sembiang pupu jalai pengarap di selampur nengeri nengah Renggat Kedua Bantu Belanja Rumah Sembiang Pengarap Bukai 2025.
Sapit Premier Sarawak, Datuk Amar Douglas Uggah Embas madah, tu sebagi ari semua penyampau RM90 juta ti disediaka Perintah Sarawak ba taun tu, nyadi kelai pengeransing perintah nengeri nentuka pemansang inklusif sereta komprehensif.
“Nyentuk diatu, sepenyampau RM35.77 juta ari RM90 juta udah diagih ungkup 171 projek nengah Renggat Keterubah enggau Renggat Kedua.
"Laluh belanja deka diberi ba bulan November tu,” ku iya maya Program Nyua Chek Bantu Belanja Rumah Sembiang Pengarap Bukai 2025 – Renggat Kedua di Dewan Utama Kompleks UNIFOR, ditu, Hari Dua.
Nambah ke jaku iya, iya madah, perintah nengeri nengah UNIFOR diatu ngenegap mekanisme matau dikena nentuka tiap belanja dikena enggau bejimat sereta nitih lalau ke ditetap.
“Kitai nemu agi bisi 220 rumah sembiang bedau ngenataika ripot belanja.
"Kitai deka meda semua rumah sembiang meri ripot belanja manggai Disember 2025,” ku iya.
Kelimpah ari nya, iya mega madah, pengawa matau diatu dipejalaika UNIFOR, dikena nentuka tiap projek nitih tuju asal maya minta bantu.
Berebak enggau nya, iya ngelalau raban pengatur rumah sembiang ngaga peminta bepelasarka guna ti patut.
Iya madah, perintah nengeri bela ngagih RM20 juta ungkup pengawa nyeleti sekula misyen di selampur Sarawak, setipak enggau pengeransing perintah nengeri ngenegap infrastruktur pelajar pengarap enggau komuniti.
Maya nya mega bela diatur pengawa nyua chek ngagai 14 pengari rayat enggau penerima ngari ke rumah sembiang pupu jalai pengarap ari selampur nengeri.
Bela datai, Sapit Premier Sarawak, Datuk Amar Prof Dr Sim Kui Hian, Menteri Pengangkut Sarawak, Dato Sri Lee Kim Shin, Menteri ba Opis Premier Sarawak, Dato Sri John Sikie Tayai, Sapit Menteri Pemansang Indu, Nembiak Mit enggau Pengelantang Komuniti Sarawak, Datuk Rosey Yunus, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, Direktor UNIFOR, Dato Georgina Apphia Ngau sereta temuai dipebasa ke bukai.-EDISI UKAS
