KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar nerima penemuai basa ari Komiti Besai Lan Berambeh Anak Sarawak (LBAS) 2025 di Astana Negeri Sarawak ditu, Hari Dua.

Penemuai nya betuai ke Menteri Kereja Raya Malaysia ke mega Kaban Parlimen Kapit ti nyadi Chairman Komiti Besai LBAS 2025, Dato Sri Alexander Nanta Linggi.

Tuju penemuai basa nya dikena ngelaluka penatai Tun Pehin Sri Dr. Wan Junaidi enggau Toh Puan Datuk Patinggi Fauziah Mohd Sanusi bejadika pengerami makai lemai LBAS 2025 ke deka diatur Hari Enam tu ba Malaysia International Trade & Exhibition Centre (MITEC), Kuala Lumpur.

Program ninting taun ti diatur Gerempung Voluntia Sarawak (Sarawak Volunteers) nya, siti nalan ngempuru nembiak Sarawak di Semenanjung Malaysia, lalu ngerapitka kaul baka diri sebilik, kaul rama enggau semangat taluk ke nengeri ba rayat Sarawak di menua orang.

Pengerami nya mega deka digulu Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Sama datai ba penemuai basa nya, Sapit Menteri Ekonomi ke mega Kaban Parlimen Mukah Dato Hanifah Hajar Taib, Kaban Parlimen Batang Lupar Mohamad Shafizan Kepli, Kaban Parlimen Lubok Antu Roy Angau Gingkoi, Kaban Parlimen Serian Dato Sri Dr. Richard Riot Jaem enggau Sapit Tuai Projek Lan Berambeh Anak Sarawak 2025, Nur Aisyah Eiryeeza Sabri Waini.-EDISI UKAS