KUCHING: Sarawak Energy majak ransing ngenegap pemansang kuasa hidro meruan ke nyadi pugu ngasil kuasa di Sarawak, seriris enggau pengeransing Perintah Sarawak nyendiaka kuasa ulih dikeandal, ulih diempu sereta ulih dikena baru.

Pengeransing tu tebantai nengah Anugerah International Hydropower Association (IHA) Blue Planet Prize 2025 ke disua ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba siti program di Kompleks Satria Pertiwi, Hari Dua.

Anugerah nya disua Tuai Pegawai Eksekutif Sarawak Energy Group, Datuk Sharbini Suhaili ti dikemata Menteri Utiliti enggau Telekomunikasyen Sarawak, Dato Sri Julaihi Narawi sereta Sapit Menteri Utiliti (Sarawak Energy & PETROS) ke mega Chairman Sarawak Energy, Datuk Ibrahim Baki.

Sarawak Energy nerima basa nya kena 9 September 2025 di Paris, Perancis, maya International Forum on Pumped Storage Hydropower.

Anugerah betikas besai nya diberi ngagai projek hidrokuasa ti mandangka tikas pemanah pemeruan bepelasarka Hydropower Sustainability Standard (HSS).

Sebedau tu, Bakun HEP bela nerima Setipikit Pirak (HSS Silver Certification) baka dipadah ba SAREF 4.0 di Kuching, asil tisih ari Hydropower Sustainability Alliance ti ngayanka pengelebih Bakun ba pengawa ngaul komuniti, nyaga biodiversiti, pengetan klimet enggau atur.

Enggau kapasiti 2,520MW, Bakun HEP siti perengka guna hidrokuasa pemadu besai di Asia Tenggara ke diaku HSS, lalu nyaup ngemujurka portfolio kuasa ulih dikena baru Sarawak enggau Murum HEP (944MW) enggau Batang Ai HEP (94MW).

Sarawak Energy ke nyadi pemekuh kuasa ulih dikena baru pemadu besai di Malaysia sereta kaban aktif IHA kenyau 2010 negap ulah pemansang hidrokuasa meruan bepelasarka prinsip “hidrokuasa ke ulih diterima semina hidrokuasa ti meruan.”

Kelimpah ari nya, Sarawak Energy mega bela nyadi Patron Global keterubah Asia Tenggara ungkup World Energy Council kenyau Mac 2024, nyaup pengeransing global ba idar kuasa sereta inovasyen enggau polisi pemeruan.-EDISI UKAS