SERIAN: Projek nyeleti Jalai Padawan Renggat Keterubah naka tu udah mujur 35.89 peratus digaga.

Sapit Premier Sarawak Datuk Amar Douglas Uggah Embas madah, projek beungkus RM73.9 juta nya dipejalaika Opis Kereja Raya (JKR) Sarawak ari baruh atur Opis Menteri Infrastruktur enggau Pemansang Penyangkai Kapal (MIPD) ngadu pengawa nyeleti jalai 14.9 kilometer (km) pemanjai ari Simpang Tapah ke Teng Bukap.

“Projek tu disadang tembu kena 3 September 2026,” ku iya sepengudah ngatur pengawa ngabas palan projek ditu, Hari Satu tu tadi.

Datuk Amar Douglas Uggah madah, penembu jalai nya deka nyadi jalai muntang Serian enggau Kuching, kelimpah meri pemaik ngagai lebih 6,000 peranak di Kampung Mundai, Kampung Simpok, Kampung Peraya, Kampung Stabut, Kampung Kirian, Kampung Sira enggau Pasar Teng Bukap.

Ku iya nerang, kelimpah nyungkak pengelikun penguna jalai alun, projek tu mega dikeandal ulih meransang dagang temuai, pengawa betanam betupi sereta sektor berumah ba kandang menua nya.

Ba penemuai nya, Datuk Amar Douglas Uggah diterang bekaul penanggul pejalai projek nyengkaum pengawa mindah tiang karan, kabel sereta pengawa ngaga rumah ba jalai perintah.

Dikena mutar pekara nya, perintah nengeri udah mayar ex-gratia sepenyampau RM1.03 juta ngagai pengempu rumah lalu Sarawak Energy Berhad (SEB) meri jamin pengawa mindah tiang deka tembu digaga manggai Disember 2025.

Datuk Amar Douglas Uggah ngarap projek nya ulih ditembuka nitih langgur ke udah ditetap .-EDISI UKAS