KUCHING: Opis Kampung Sarawak mujur mandangka pengulih bejalaika tanggungpengawa ngemujurka tuju Transformasyen Gadung Sarawak nengah pengeransing ngatur kampung meruan, inovasyen digital enggau kerejasama strategi antarabansa.
Sapit Premier Sarawak ke mega Menteri Pengeraja Asal enggau Pemansang Mengeri II, Datuk Amar Awang Tengah Ali Hasan madah, Opis Kampung Sarawak ngesan tanggungpengawa besai nentuka pemansang gadung nengeri dipejalaika enggau chara sebela nyerumba pemansang ekonomi enggau pemeruan rampa menua.
Nitih ku iya, pejalai sistem digital baka Enterprise Forest Information Management System (EFIMS) enggau Sarawak Logs Tracking and Forest Revenue System (REVLOG) mandangka pengulih opis nya negap pengawa ngatur penatai rampa menua enggau chara ti lurus, efisyen sereta integriti.
“Nengah chara bepelasarka teknologi enggau data tu, Sarawak nyadi siti ari nengeri nyulut ngatur kampung enggau chara meruan, seriris enggau juluk ati pemansang gadung nengeri," ku iya.
Iya madah munyi nya ba Pengerami Anugerah Servis Nyulut (APC) enggau Masa Orang Pinchin Opis Kampung Sarawak 2025 ditu, Hari Satu tu tadi.
Berebak enggau nya, Datuk Amar Awang Tengah muji pemujur Opis Kampung Sarawak ti udah masukka 1.6 juta hektar kampung ba setipikit ari baruh Malaysian Timber Certification Scheme (MTCS), bejalaika lisin karbon kampung keterubah di Malaysia sereta nanam lebih 50 juta pun kayu nengah kimpin Nanam 100 Juta Pun Kayu, lalu ngelui juluk ati tumu ari ke disadang.
Iya madah, pemujur nya setipak enggau tuju Strategi Pemansang Udah COVID-19 (PCDS) 2030 enggau Sarawak Sustainability Blueprint 2030 ti ransing nyemela pemansang ekonomi enggau ngintu rampa menua.
Kelimpah ari nya, ku iya, kerejasama strategik Opis Kampung enggau institusyen antarabansa baka Smithsonian Institution, Harvard University enggau National Institute for Environmental Studies (NIES) Jepun ngenegapka agi penuduk Sarawak nyadi pemekuh ba bidang ngatur kampung tropika sereta nagang ubah klimet ba renggat global.
Ba pengerami nya mega, Datuk Amar Awang Tengah bela meri basa ngagai orang pinchin gawa enggau penerima Anugerah Servis Nyulut nyadi kelai basa ngagai pengawa, pengepuh enggau saup sida ngagai opis.
Bisi 89 pegawai enggau staf nerima Anugerah Servis Nyulut lalu 35 penerima nerima Basa Pinchin.
Sama datai, Sekretari Mendam Opis Menteri Pengeraja Asal enggau Pemansang Mengeri Datu Abdullah Julaihi, Direktor Opis Kampung Sarawak Datu Hamden Mohammad, Menijar Besai LCDA Datu Dr. Zaidi Mahdi, Direktor Opis Tanah enggau Survei Sarawak Datu Awang Zamhari Awang Mahmood, Pengawal Kualiti Rampa Menua Sarawak (NREB) Datu Jack Liam, Menijar Besai PUSAKA Datu Zainal Abidin Abdullah enggau Menijar Besai Sarawak Forestry Corporation Abang Arabi Abang Aimran-EDISI UKAS
