KUCHING: Inisiatif nutup lalu ngena baru Paip Gas Sabah–Sarawak (SSGP) siti pengawa strategik Perintah Sarawak ke beambi ulih enggau bekenaka aset kuasa ke bisi dikena nyaup pemansang industri baru ti meruan.

Sapit Premier Sarawak ke mega Menteri Pengeraja Asal enggau Pemansang Mengeri, Datuk Amar Awang Tengah Ali Hasan madah, program tu sebagi ari pelin timpuh panjai nengeri dikena ngenegap industri enggau idar kuasa Sarawak.

“Opis Menteri Pengeraja Asal enggau Pemansang Mengeri (MUDeNR) udah dipadu Perintah Nengeri nyadi agensi nyeraris pengawa nutup sereta ngemuntang pengawa bekena baru SSGP enggau Right-of-Way (ROW).

“Inisiatif tu setipak enggau pelin timpuh panjai Sarawak ngena infrastruktur kuasa ungkup industri baru meruan,” ku iya maya ngulu Aum Ngatur Program Nutup enggau Ngena Baru SSGP, ditu, Hari Satu tu tadi.

Iya nerang pengawa nutup SSGP lalu pengawa nyerah ROW ari PETRONAS ngagai Perintah Sarawak, kelai pengawa besai nyungkak penyereta sereta pengawa beempu nengeri ba reta kuasa kritikal.

Maya nya mega, PETRONAS Carigali Sdn. Bhd. (PCSB) bela bejuraika ripot ti komprehensif senentang status aset SSGP di Sarawak sereta pengulih projek ti tau mai pemaik ngagai infrastruktur enggau ROW ke mengkang, nitih ke palan engkeman sereta pengawa nisih pemeruan.

Dikena nentuka pejalai pengawa ti efektif, aum mega bekunsi pekara bekaul penumbuh Sabah and Sarawak Gas Pipeline Decommissioning Coordination Committee (SDCC) ke ditumbuh Perintah Sarawak enggau PCSB.

Komiti tu bejalaika pengawa ngatur pejalai nutup enggau nyerah reta SSGP nengah chara ti lebih berurun, likun sereta meruan nitih standard industri enggau juluk ati Perintah Sarawak.-EDISI UKAS