KUCHING: Sarawak diatu benung bejalaika pengawa pemansang nengah Pelin Pemansang Malaysia Lumpar Ke-13 (RMK-13) ti nyadi pugu ngubah menua ungkup lima taun deka datai.

Sekretari Perintah Sarawak, Datuk Amar Mohamad Abu Bakar Marzuki madah, RMK-13 begunaka atur ti entap, pejalai pengawa ti bisi disiplin sereta pengepuh ari semua raban nyengkaum Servis Perintah Sarawak (SCS).

Ku iya, SCS deka terus ransing bejalaika RMK-13 enggau penyulut, integriti sereta tanggungpengawa, lalu beratika pejalai pengawa, ngenatai servis sereta asil ti nentuka pemaik ari pemansang diasai selampur menua di Sarawak.

“Kami deka nentuka pengawa, meri servis sereta nempa asil, ti ulih mai pemaik pemansang diasai ba tiap endur di Sarawak.

“Kami mega deka terus bekerejasama nyadi siti tim enggau sektor peribit, pemeranak puku enggau komuniti, nempa kerejasama ti nyungkak inovasyen, negap pengawa besemekih, sereta meransang pemansang inklusif,” ku iya.

Iya mansut ke jaku nya ba Pengawa Bejadi Pelin Pemansang Malaysia Lumpar Ke-13 (RMK-13) Sarawak ditu, Hari Satu.

Datai bejadika program nya Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Nitih ku Datuk Amar Mohamad Abu Bakar, RMK-13 begunaka prinsip 3R, iya nya ‘Revisit’, ‘Rethink’ enggau ‘Recharge’ dikena nisih baru
pelajar ke diulih, beratika strategi ungkup pemaik ti besai agi sereta ngemaru semangat Sarawak nuju juluk ati 2030.

“Keterubah, SCS deka mutar penanggul pejalai pelin dikena nentuka pejalai projek ke benung digaga jampat agi sereta mujur lalu ngempung asil sereta pemujur ari Pelin Pemansang Malaysia Lumpar Ke-12 (RMK-12) sereta PCDS 2030 seraya ngerembai inisiatif ke udah ditemu mujur.

“Ketiga, SCS deka ngelangkar tuju ke mua ti bepelasarka dudi hari nengah ngulih peluang baru, nerenak inovasyen sereta matak pengawa meranak puku perintah enggau peribit ti meri empas besai ungkup pemansang Sarawak dudi hari," ku iya nerang baru.

Sama datai, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, Menteri Kereja Raya Dato Sri Alexander Nanta Linggi, raban Menteri enggau Sapit Menteri Kabinet Sarawak, raban tuai opis perintah sereta pemesai bukai. -EDISI UKAS