KUCHING: Sarawak ngatur pejalai Pelin Pemansang Malaysia Lumpar Ke-13 (RMK-13) nengah 10 strategi ti dilangkar dikena beratika penatai enggau kerejasama ba bidang ke meri empas pemadu besai ngagai pemansang kandang menua tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa keterubah, iya nya ngerumban idar kuasa beresi nengah numbuh atur nyaga kuasa, nempa Hab Hidrogen Sarawak sereta negap kapasiti ngasil kuasa, nganjung sereta nyimpan kuasa.
Nambah ke jaku iya, iya madah, strategi kedua iya nya pemansang enggau pematak industri strategik nengah kerejasama tegap, rentayan bekal menua sereta pemansang kapasiti Dagang Mit, Jelan Pemesai (PKS) enggau zon strategik baka Hab Beresi Karbon Kuching enggau Zon Ekonomi Kuasa Ulih Dikena Baru Baram ti disadang nyadi penyungkak pemansang meruan.
“Strategi ketiga beratika pengawa nyungkak pengandal ati pemeranak puku enggau penyereta sektor peribit nengah nambah manah atur, nyeraris atur, sereta negap langkar bekunsi perintah-peribit enggau polisi infrastruktur sereta utiliti ke deka ditisih ngambi engkeman ungkup tuju idar kuasa enggau pemeruan kitai," ku iya nerang.
Iya madah munyi nya maya bejaku ba Pengawa Bejadi Pelin Pemansang Malaysia Lumpar Ke-13 (RMK-13) Sarawak ditu, Hari Satu.
Berebak enggau nya, Premier Sarawak bela ngemerat pemesai reti beambi ulih bekenaka tanah enggau chara optimum dikena betanam betupi, pemansang industri enggau mengeri, meranak puku ba palan perubat serantau, program pengelantang ruang bilik enggau inisiatif baka Sarawak Women@Work sereta ‘Sarawak Family First Initiative’ sereta program pemansang penau baka ‘Sarawak Employment Package’ (SPACK) enggau ‘Regional Youth Centres’ ngambi nentuka nembiak enggau profesional nengeri terus nyaup pemansang Sarawak.
Kelimpah ari nya, Sarawak ku iya, deka negap pengelikun penusah ngenyit, atur klimet nengah numbuh ‘Sarawak Climate Change Centre’ enggau ‘Climate Finance Facility’, ngatur penatai rampa menua enggau chara ti meruan sereta ngemansangka komuniti dagang Bumiputera ti tegap sereta tan.
“Semua tu bisi tuju ti nyengala, nentuka pemansang Sarawak meruan sebela, inklusif sereta meruan manggai taun 2030,” ku iya.
Sama datai, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, Menteri Kereja Raya Dato Sri Alexander Nanta Linggi, raban Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, raban Sapit Timbalan Menteri Kabinet Sarawak, raban tuai opis perintah sereta pemesai bukai. -EDISI UKAS
Disediaka: Jonnie Kiew
Gambar: Muhammad Rais Sanusi
