KUCHING: Sarawak beratika polisi baru, Kompeni Enggi Nengeri (SOEs) ke deka dipejuraika ba Bajet Nengeri 2026 maya Aum Besai Kunsil Nengeri (DUN) November tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, polisi nya deka nyengulai sereta nyaga reta nengeri ba baruh langkar atur ti tegap agi, nentuka operasyen SOEs seriris enggau disiplin komersil, tanggungpengawa rama, enggau pemeruan timpuh panjai.
“SOEs kitai deka berubah awakka sida berengkah ke pengawa enggau manah agi, nyulut sereta ngembuan disiplin enggau tuju nyemela pemujur komersil enggau servis perintah.
“Pengawa nambah manah institusyen enggau atur besai reti dikena ngamatka juluk ati tu ke alai atur ti manah nentuka tiap pengawa meranak puku enggau pemutus polisi bepelasarka integriti, pengelurus enggau akauntabiliti,” ku iya.
Iya madah munyi nya maya bejaku ba Pengawa Bejadi Pelin Pemansang Malaysia Lumpar Ke-13 (RMK-13) Sarawak ditu, Hari Satu.
Seriris enggau juluk ati nya, iya madah, Sarawak deka ngena Kod Atur Korporat ungkup SOE, netapka standard baru ungkup pengelurus enggau etika.
“Nengah matau tikas pemanah digital, kitai deka meda asil ukai semina ari sukut pekara wang, tang mega nilai ke bendar ti diberi ngagai rayat, tuju ti tampak, etika ti tegap enggau empas ti ulih disukat ke deka nyadi lalau penyulut atur," ku iya.
Nitih ku iya, Sarawak diatu ngembuan beberapa buah SOEs ti nyadi lalau ba macham sektor baka Petroleum Sarawak Berhad (PETROS) ba sektor minyak enggau gas lalu Sarawak Energy Berhad (SEB) nyungkak kuasa ulih dikena baru.
Kelimpah ari nya, ku iya, Sarawak Metro megai tanggungpengawa ngemaruka mobiliti mengeri, Kaunsil Pemansang Ekonomi Sarawak (SEDC) udah mayuh ngemansangka industri ili, dagang temuai enggau dagang bepelasarka agro, lalu Yayasan Sarawak meranak puku ba pelajar enggau pemansang penau.
Nambah ke jaku iya, Datuk Patinggi Abang Zohari madah, pemujur juluk ati tu ila bepanggai enggau kerejasama enggau Perintah Sarawak nyendiaka juluk ati, sektor peribit nyungkak pemansang, lalu SOEs nyadi pemekuh industri strategik.
Sama datai maya nya, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, Menteri Kereja Raya Dato Sri Alexander Nanta Linggi, raban Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, raban Sapit Menteri Kabinet Sarawak, raban tuai opis perintah enggau temuai dipebasa ke bukai. -EDISI UKAS
Disediaka: Jonnie Kiew
Gambar: Muhammad Rais Sanusi
