Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg nerima dua penemuai basa di Wisma Bapa Malaysia, Hari Tiga.
Penemuai basa keterubah ari Angkatan Zaman Mansang Sarawak (AZAM) berandauka kuing tuju enggau chara baru sida ngaga projek jemah ila.
Chairman Azam, Datu William Patrick Nyigor madah, sida nerima enggau lantang ati perambu ke udah dipadahka Datuk Patinggi Tan Sri Abang Zohari lebih agi ba pemansang projek dudi hari.
“Kami betemu enggau Premier Sarawak dua taun ke udah lalu penemuai serak tu dikena kami madahka penerang pemadu baru bekaul aktiviti ti udah digaga kami.
“Iya mega bekunsika penemu dikena kami ngubah kuing tuju enggau chara ngaga projek ti deka diadu ila,” ku iya.
Nangkan ke nya, Premier Sarawak nerima penemuai basa Ari Gerempung Ejensi Umrah Enggau Haji Sarawak (SUHA) ti diuluka Chairman iya, Ruzaiman Ghazalee.
Maya ditanya media, Ruzaiman madah, pekara ti dikerandau sida maya penemuai basa tu iya nya isu pemadu baru bekaul umrah enggau haji di Sarawak.
Ku iya, pelin Sarawak deka ngangkatka industri penerebai bilun ulih nyediaka pejalai ari Kuching terus ke Jeddah, Mekah.
“Tu endang juluk SUHA enggau raban ari Sarawak ti deka minta penerebai bilun ari Kuching ngagai Jeddah lalu pekara tu agi diputarka sida.
“Kami andal pekara tu ila ulih diatur ngambika ulih ngemuntang sida ba nengeri tu,” pia ku iya. -EDISI UKAS
