KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar udah nerima penemuai basa ari Komiti Sarawak-Regatta Kuching Waterfront 2025 di Astana Negeri Sarawak, Hari Satu.

Deligit nya betuaika Menteri Dagang Temuai, Industri Kreatif enggau Pemerindang, Dato Sri Abdul Karim Rahman Hamzah.

Tuju penemuai basa nya dikena ngelalu Tun Pehin Sri Dr. Wan Junaidi enggau Toh Puan Datuk Patinggi Fauziah Mohd Sanusi ngulu beberapa bengkah batang program ke deka diatur pun bulan November tu.

Tu nyengkaum Festival Gendang Sarawak 2025 ke diatur kena 1 November 2025 di Kuching Waterfront.

Pengerami nya bela disadang deka digulu Kebawah Duli Paduka Baginda Sultan Pahang, Al-Sultan Abdullah Ri’ayatuddin Al-Mustafa Billah Shah enggau Kebawah Duli Paduka Baginda Tengku Ampuan Pahang, Tunku Azizah Aminah Maimunah Iskandariah sereta Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Pengerami Nutup Regatta Sarawak 2025 diatur nangkan nya, 2 November 2025.

Dua bengkah pengerami nya, lebih agi Regatta Sarawak mandangka pengeransing Perintah Sarawak nyungkak pesaka budaya, main lama sereta seni pemerindang sereta ngenegap kaul rayat.

Bela datai maya penemuai basa nya, Sapit Menteri Dagang Temuai, Industri Kreatif enggau Seni Pemerindang (Industri Kreatif enggau Seni Pemerindang) Datuk Snowdan Lawan enggau Sapit Menteri Dagang Temuai, Industri Kreatif enggau Seni Pemerindang (Dagang Temuai), Datuk Sebastian Ting Chiew Yew sereta Residen Sitak Kuching, Dayang Joanita Azizah Abang Morshidi.

Sama datai Direktor Opis Pemansang Kraf Jari Malaysia Pampang Sarawak, Mohd Fu’ad Ariffin, Direktor Opis Main Asal enggau Seni Menua (JKKN) Sarawak, Noor Seela Noor Sulaiman, Kontroller Opis Sungai-Sungai Sarawak, Lt. Kol. (B) Ding Tiew Wong, pengari Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak, Tracy Evon, pengari Direktor Unit Komunikasi Awam Sarawak (UKAS), Joachim Paggang Jabong enggau pengari Unit Protokol, Adat enggau Pengatur Program Nengeri Sarawak, Wan Fauzi Wan Ismail.-EDISI UKAS