KUCHING: Juluk ati Sarawak ke deka nyadi pemekuh industri semikonduktor enggau Artificial Intelligence majak chakah diatur sepengudah SMD Semiconductor Sdn. Bhd, kompeni enggi Perintah Sarawak nyain Sempekat Pemereti Ati (MoU) strategik enggau Rebellions Inc. ari Korea Selatan ba opis Sekretari Pekara Wang Sarawak di Wisma Bapa Malaysia, ditu, Hari Satu.
Pengawa nyain MoU nya dikemata Chairman SMD Semiconductor, Dato Sri Dr Wan Lizozman Wan Omar enggau Sapit Sekretari Perintah Sarawak (Perambu Ekonomi & Pemansang), Dato Sri Dr Muhammad Abdullah Zaidel.
Dulu ari nya, deligit Rebellions Inc. ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi.
Penemuai tu nangkan pengawa betemu strategik deligit Sarawak ngagai indu opis Rebellions di Seongnam City, Korea Selatan kena 1 Oktober 2025 ti betuaika Dato Sri Dr Muhammad Abdullah.
Pengawa nanggam MoU tu dikena negap kerejasama teknologi Sarawak enggau Korea Selatan ti ngembuan pengingin deka besemekih ba global ba makit chip AI, ti ngelama tu dikemudi industri baka Nvidia Corporation.
Rebellions Inc., kompeni di Republik Korea sereta dibasa nyadi pemekuh global ba teknologi AI sigi bisi pengelandik ba langkar chip AI betikas tinggi ti nyukung pengawa bekenaka AI rebak baru, proses data ti jampat sereta aplikasyen komputer.
Nengah kerejasama tu, kedua iya deka ngemansangka platform inovasyen aplikasyen AI, negap pengulih langkar semikonduktor, sereta nyual teknologi AI baru, lalu nempa Sarawak enggau Malaysia menua besemekih baru ti signifikan ba renggat global.
Skop MoU nyengkaum inisiatif begulai ba ngatur ‘data centre’, pemansang aplikasyen AI betikas industri sereta program latih begulai enggau universiti menua, kelimpah nyerungkai peluang meranak puku ekuiti sereta mai awak ngagai kerejasama bukai.
Bela datai, Kaban Komiti Besai SMD Semiconductor Datu John Wayne Chamberlain Sirau enggau Dato (Dr.) Salihin Abang, Sekretari Mendam Opis Menteri Pelajar, Inovasyen enggau Pemansang Penau Sarawak Datu Adana Jed enggau Tuai Pegawai Eksekutif SMD Semiconductor Shariman Jamil.-EDISI UKAS
