KUCHING: Sarawak ngelangkar siti agi pemujur ba pengeransing nyadi pemekuh industri teknologi moden global nengah kerejasama strategik SMD Semiconductor enggau Rebellions Inc. ari Korea Selatan.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kerejasama nya mandangka pengandal kompeni antarabansa nya ngagai pengulih Sarawak ke nyadi bakih teknologi ba ekosistem semikonduktor enggau Artificial Intelligence (AI).
“Kerejasama tu ngayanka siti agi pemujur ungkup SMD Semiconductor nangkan kerejasama enggau United Kingdom ba pengawa ngaga semikonduktor ti meruan sereta pemadu mansang, latih pengereja pengawa enggau pemansang baru teknologi moden.
Iya madah munyi nya ba aum media pengudah nerima penemuai basa ari Penumbuh enggau Tuai Pegawai Eksekutif Rebellions Inc, Sung Hyun Park di Kompleks Satria Pertiwi, ditu, Hari Satu.
Datuk Patinggi Abang Zohari nerang, Rebellions siti kompeni pemekuh teknologi AI enggau pengelandik ba High Bandwidth Memory (HBM) ti ngulihka pengawa ngasil chip bepengelaju sereta ngelimat kuasa.
Iya madah, nengah sinergi tu, SMD Semiconductor enggau Rebellions deka bekerejasama ba pengawa mindah teknologi, latih pengereja pengawa sereta pemansang chip betikas besai ungkup makit serantau.
Nitih ku Premier Sarawak, kerejasama tu seriris enggau juluk ati nengeri ke deka ngemansangka ‘Integrated Longhouse Silicon Valley’ sereta nyaup Strategi Pemansang Udah COVID-19 (PCDS) 2030, ti beratika pemansang ekonomi bepelasarka inovasyen enggau teknologi.
Iya bela madahka dalam kandang timpuh lima ngagai sepuluh taun deka datai, sektor ’angkasa lepas’ deka nyadi bidang ke begunaka mayuh chip sereta komunikasyen digital setipak enggau pemansang teknologi enggau guna satelit.
Ku iya, ekosistem ti deka dikemansang enggau sukung Rebellions ke dipelaba nyadi penyungkak ngagai pengeransing Sarawak ba negap penuduk iya nyadi hab teknologi tinggi serantau.
Bela datai, Sekretari Pekara Wang Sarawak ke mega Chairman SMD Semiconductor Sdn Bhd, Dato Sri Dr Wan Lizozman Wan Omar, Kaban Komiti Besai SMD Semiconductor Datu John Wayne Chamberlain Sirau enggau Dato (Dr.) Salihin Abang, Sapit Sekretari Perintah Sarawak (Perambu Ekonomi & Pemansang) Dato Sri Dr. Muhammad Abdullah Zaidel, Sekretari Mendam Opis Menteri Pelajar, Inovasyen enggau Pemansang Penau Sarawak Datu Adana Jed, enggau Tuai Pegawai Eksekutif SMD Semiconductor Shariman Jamil.-EDISI UKAS
Disediaka: Nur Nabilla
Gambar: Muhammad Hanif Suhaimi
