BINTULU: Raban nembiak nya tuai dudi hari ti deka nampung legasi tuai Sarawak ngena juluk enggau integriti.

Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah madah, nembiak nya agen ubah ti nyungkak pemansang ekonomi, sosial, budaya enggau teknologi nengeri.

Ku iya, kerejasama nembiak deka mekuh semangat begulai, nempa penemu baru sereta nyendia peluang nempa rentayan enggau kerejasama ti ulih nyagu nembiak Sarawak ba renggat tinggi agi.

“Naka diatu, Opis Menteri Nembiak, Lumba enggau Pemansang Orang Dagang Sarawak udah ngatur program Roadshow Nembiak Sarawak ba 33 pelilih ngaul lebih 25,000 nembiak.

“Tu siti ari inisiatif perintah ngaul nembiak ba renggat baruh nyengkaum menua pesisir enggau menua ulu, meri peluang ngambi bagi ba aktiviti ti meri pemaik, nempa pemereti ati sereta semangat nyadi tuai seraya ngurang takah pemansang ngambi nadai nembiak kena tinggal ba arus pemansang nengeri,” ku iya.

Iya nyebut pekara nya ba jaku pengelalu lebuh Pengerami Ngintu Minggu Nembiak Sarawak 2025 ba Balai Suarah Bintulu kena Hari Minggu.

Pengawa nutup program nya dipenyadi Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau digulu bala temuai dipebasa bukai, tuai opis sereta bala nembiak.

Ku iya, Minggu Nembiak Sarawak mega ngaku enggau meri peransang ngagai nembiak nengah pemandang penau, pekit sereta anugerah.

“Nengah pemisi woksyop, forum enggau latih, nembiak kitai disikap ngena penemu enggau pengelandik baru nyengkaum nyadi tuai, digital, inovasyen enggau dagang.

“Tu mega ngerandang jalai ungkup rentayan enggau kolaborasyen begulai enggau perintah, industri, institusyen pelajar sereta NGO,” ku iya baru.

Ku iya, penatai nembiak ukai semina meri empas besai ngagai program tu tang mega meri inspirasyen enggau peransang ngagai nembiak bukai ti apin bisi peluang ngambi bagi.

Pengerami Minggu Nembiak Sarawak 2025 diatur ari 13 nyentuk 19 Oktober ti ngatur tiga aktiviti vesai nengah 16 isi program iya nya Youth Champion, Youth X-Tive enggau Youth Marketplace.

Nangkan nya, anak asal Kuching, Shahradhi Libiki Iskandar Ridhuan (33 tahun) bulih Anugerah Nembiak Sarawak 2025 (Kategori Individu Lelaki).

Anugerah ungkup Kategori Individu indu mega diempu Rapunzel Anthony Jamuh (28) ari Miri.

Saberkas Pampang Satok mega nyadi champion Anugerah Gerempung Nembiak Sarawak 2025 seraya lumur dua kategori sebaka dipenggi Kelab Iban Mansang Bawang Assan. - EDISI UKAS